పనిలో ఉన్నప్పుడు తాగవద్దు: అధికారులకు మంత్రి ఆదేశం

ఇటీవలి కాలంలో టీఆర్ఎస్ నాయకులు వివాదాస్పద వ్యాఖ్యలు చేస్తూ తరచూ వార్తల్లో నిలుస్తున్నారు. నాయకత్వాన్ని.. వారి ఆదేశాలను కూడా పట్టించుకోకుండా నోరు జారుతున్నారు. సిఎం కెసిఆర్, కెటిఆర్‌లకు ఈ విషయంపై సీరియస్ గా చెప్పినప్పటికీ టిఆర్‌ఎస్ నాయకుల వైఖరిలో మార్పు లేదు. తాజాగా మరో రాజకీయ నాయకుడు నోరుజారారు. అధికారులపై అనాలోచిత వ్యాఖ్యలు చేశారు.

మంత్రి ఎర్రబెల్లి దయాకర్ రావు తాజాగా ఐనవోలులో వివాదాస్పద వ్యాఖ్యలు చేశారని మీడియాలో వార్తలు వస్తున్నాయి. ‘మల్లన్న జాతార’ ఏర్పాట్లను తాజాగా మంత్రి సమీక్షించారు. సమీక్ష తరువాత, ఎర్రబెల్లి అధికారులతో సమావేశమయ్యారు. ఈ సమయంలో మంత్రి వారందరికీ హెచ్చరిక జారీ చేశారని తెలిసింది..

‘మేడారం జాతార’ సమయాన్ని గుర్తుచేసుకుంటూ మంత్రి ఎర్రబెల్లి అధికారులపై ఈ వ్యాఖ్యలు చేశారని మీడియాలో వార్తలు వస్తున్నాయి..“హ్యాంగోవర్‌లో పనికి రావద్దు. మేడారం జాతార సమయంలో చాలా మంది అధికారులు విధుల్లో మద్యం సేవించారు. ఇలాంటి ప్రవర్తన ఈసారి సహించను. పనిలో ఉన్నప్పుడు అధికారులు మద్యం తాగద్దు. స్టిక్ట్ గా పని మీద ఉండాలి. ” అని ఎర్రబెల్లి అన్నట్టు ప్రచారం సాగుతోంది.

అక్కడే ఉన్న టిఆర్ఎస్ నాయకులు.. ఇతర అధికారులు మంత్రి వ్యాఖ్యలను చూసి ఆశ్చర్యపోయారని తెలిసింది. అధికారులు ఈ వ్యాఖ్యలను తీవ్రంగా పరిగణించినట్లు తెలుస్తోంది.. ఏ సందర్భం అయినప్పటికీ ఎర్రబెల్లి వ్యాఖ్యలు ఇప్పుడు చర్చనీయాంశంగా మారాయని ఆ జిల్లాలో మాట్లాడుకుంటున్నారు.