జైలుశిక్షకు కోత పెట్టనున్న ‘‘యోగా’’

జైలుశిక్ష అనుభవిస్తున్న ఖైదీలకు మహారాష్ట్ర ప్రభుత్వం బంపర్ ఆఫర్ ప్రకటించింది. జైలుశిక్ష అనుభవిస్తున్న ఖైదీలు జైల్లో కానీ యోగా నేర్చుకుంటే ఖైదీలు అనుభవిస్తున్న శిక్షా కాలంలో గరిష్ఠంగా మూడు నెలల వరకూ శిక్ష తగ్గే వీలుంది. తాజాగా ఈ నిర్ణయాన్ని మహారాష్ట్ర సర్కారు తీసుకుంది.

యోగా నేర్చుకొని.. నైపుణ్యం సాధించిన ఖైదీలకు గరిష్ఠంగా మూడు నెలలు జైలుశిక్షలో కోత వేయాలన్న నిర్ణయం ఇప్పుడు ఆసక్తికరంగా మారింది. అయితే.. ఈ నిర్ణయాన్ని ప్రస్తుతానికి ఫూణెలోని జైలుకు మాత్రమే పరిమితం చేశారు.

ఇక్కడ ప్రయోగాత్మకంగా పరిశీలించిన తర్వాత.. రాష్ట్రంలోని మిగిలిన జైళ్లకు ఈ నిబంధనను వర్తింపచేస్తారు. జైల్లోయోగా శిక్షణ ఇవ్వటం గతంలోనే ఉన్నప్పటికీ.. జైళ్ల సంస్కరణల్లో భాగంగా యోగాలో నైపుణ్యం సాధించిన వారికి శిక్ష తగ్గించాలన్న నిర్ణయాన్ని మహారాష్ట్ర ప్రభుత్వం తీసుకుంది. మరి.. ఈ నిర్ణయాన్ని మిగిలిన రాష్ట్రాలు అనుసరిస్తాయో లేదో చూడాలి. యోగా.. ఖైదీల జైలుశిక్ష తగ్గించటం ఆసక్తికర పరిణామమే సుమా.