అందుకే.. పరమాన్నం బాబా ట్రాప్ లో పడ్డాడట

రెండు తెలుగు రాష్ట్రాల్లో సంచలనంగా మారిన పరమాన్నం బాబా యవ్వారంలో కొత్త అంశాలు తెర మీదకు వస్తున్నాయి. అంత పెద్ద స్థాయి వ్యక్తి పరమాన్నం బాబాకు ఎలా బుక్ అయ్యారు? లైఫ్ స్టైల్ బిల్డింగ్ ఓనర్ లాంటి డబ్బున్న పెద్దమనిషి ఇంత మాయలో ఎలా పడ్డారన్నది చాలామంది మదిలో మెదులుతున్న ప్రశ్న. మరో కీలకమైన అంశం ఏమిటంటే.. ఎంత పెద్ద డబ్బున్న మారాజు ఇంట్లో అయినా.. ఇవాల్టి రోజు కోటి రూపాయిలకు పైగా క్యాష్ ను పెట్టుకోవాల్సిన అవసరం ఏమిటన్నది మరో ప్రశ్న. వీటికి సమాధానం దొరికే ప్రయత్నం చేస్తున్న పోలీసులకు సరికొత్త విషయాలు తెలుస్తున్నట్లు చెబుతున్నారు.

విశ్వసనీయ సమాచారం ప్రకారం.. అత్యాశే.. లైఫ్ స్టైల్ బిల్డింగ్ ఓనర్ మధుసూదన్ రెడ్డిని అడ్డంగా బుక్ చేసిందన్న మాట వినిపిస్తోంది.బురిడీ బాబా ట్రాప్ లో పడటం వెనుక పెద్ద కథే ఉందని చెబుతున్నారు. ఇంట్లో వాస్తు దోషం.. గృహశాంతి లాంటి మాటలన్ని ఉత్తవేనని.. దొంగబాబా తనకు బాగా అలవాటైన పాత ట్రిక్ ఒకటి ఉపయోగించారని చెబుతున్నారు. లక్ష రూపాయిల్ని రెండు లక్షల రూపాయిలుగా మారుస్తానంటూ తియ్యటి మాటలు చెప్పే దొంగస్వామి.. తన మాటలకు తగ్గట్లే చేతల్లో చేసి చూపించాడని చెబుతున్నారు.

గతంలో పూజల పేరిట మధుసూదన్ రెడ్డి రూ.1.5లక్షల్ని ఏకంగా రూ.3లక్షలుగా చేసి ఇవ్వటంతో పరమాన్నం బాబా మీద బాగా గురి పెట్టుకున్నట్లుగా తెలుస్తోంది. అందుకే ఈసారి భారీ మొత్తాన్ని పూజలో పెట్టేసి.. అంతకు రెట్టింపు డబ్బు సొంతం చేసుకోవాలన్న ఉద్దేశంతోనే తాజా పూజ చేయించినట్లుగా తెలుస్తోంది. అందుకే భారీ మొత్తాన్ని స్నేహితుల దగ్గర నుంచి తీసుకొచ్చారని చెబుతున్నారు. తాజా పూజలో రూ.1.3కోట్లు పెట్టటం ద్వారా.. ఒక్కసారిగా డబుల్ చేయాలన్న అత్యాశతో తాజా పూజకు ఓకే చెప్పారని.. పరమాన్నం బాబా వేసిన ఉచ్చులో పడ్డారని చెబుతున్నారు. ఈ వ్యవహారం తెలిసిన వారంతా.. అంత డబ్బులు ఉండి కూడా.. డబ్బు కోసం మరీ అంత కక్కుర్తా? అన్న షాక్ కు గురి అవుతున్నారు.