పవన్ కోసం గబ్బర్ సింగ్ గ్యాంగ్

గబ్బర్ సింగ్ సినిమాలో పవన్ కళ్యాణ్ తో కలిసి నటించిన విలన్ బ్యాచ్ ఇప్పుడు పవన్ కోసం ప్రచారానికి సిద్ధమైంది. ఏపీలోని ప్రతి ఇంటికి గాజు గ్లాసుతో వెళ్లి పవన్ కళ్యాన్ జనసేనకు ఓటు వేయాలని కోరుతామని తాజాగా గబ్బర్ సింగ్ గ్యాంగ్ ప్రకటించింది.

గబ్బర్ సింగ్ సినిమాలో ‘అంత్యాక్షరి’ ఎపిసోడ్ లో దాదాపు 15 మంది వరకు టాలీవుడ్ విలన్ వేశాలు వేసే యాక్టర్లు నటించారు. వారంతా పవన్ కు వీరాభిమానులు. తర్వాత పలు సినిమాల్లో కూడా ఈ గ్యాంగ్ లోని సభ్యులు నటించారు. తద్వారా ప్రజల్లో గబ్బర్ సింగ్ గ్యాంగ్ గా పేరొందారు.

తాజాగా గబ్బర్ సింగ్ గ్యాంగ్ నెల్లూరు జిల్లాలో గూడురులో జరిగిన ఓ కార్యక్రమంలో పాల్గొన్నారు. అక్కడే వారు పవన్ కళ్యాణ్ - జనసేనకు సపోర్టుగా ప్రచారం చేశారు. పవన్ కళ్యాణ్ కు ఓటు వేసి గెలిపించాలని.. ఏపీకి సీఎంను చేయాలని జనసేన ఎన్నికల గుర్తు గాజుగ్లాస్ తో ప్రజలను వేడుకున్నారు. ప్రచారం ఇప్పుడే మొదలు పెట్టామని రాబోయే రోజుల్లో పవన్ తరుఫున ఉదృతంగా ప్రచారం చేస్తామని ఆ బ్యాచ్ సభ్యులు తెలిపారు.

తమతోపాటు పవన్ కు మద్దతుగా చాలా మంది సినీ ప్రముఖులు పవన్ కు మద్దతుగా వచ్చి ప్రచారం చేస్తారని గబ్బర్ సింగ్ గ్యాంగ్ సభ్యులు తెలిపారు. కాగా జనసేనాని పవన్ పిలవకుండా ఈ గ్యాంగ్ వచ్చి ప్రచారం చేస్తోంది. ఇక పవన్ పిలిస్తే సినిమా ఇండస్ట్రీలోని ఆయన అనుయాయులు నటులు తరలివచ్చి జనసేన ప్రచారాన్ని హోరెత్తించే అవకాశాలు మెండుగా కనిపిస్తున్నాయి.