కేసీఆర్ మాటకు గాలి భలే కౌంటర్ వేశారు

నిజాం కాలం నాటి ఢిల్లీలోని ఏపీ భవన్ ను తమకు అప్పజెప్పాలని.. తెలంగాణ సంస్కృతిని ఉట్టిపడేలా అద్భుతమైన రీతిలో తెలంగాణ భవన్ ను తాము నిర్మించుకుంటామంటూ తెలంగాణ రాష్ట్ర ముఖ్యమంత్రి కేసీఆర్ కేంద్రాన్ని కోరటం తెలిసిందే. గురువారం కేంద్ర మంత్రి రాజ్ నాధ్ సింగ్ కు రాసిన లేఖలో ఢిల్లీలోని ఏపీ భవన్ తమకు అప్పగించాలన్న మాటతో పెద్ద చర్చకు తెర తీసిన కేసీఆర్ కు ఏపీ టీడీపీ నేత గాలి ముద్దుకృష్ణమ నాయుడు తనదైన శైలిలో కౌంటర్ వేసే ప్రయత్నం చేశారు.

ఢిల్లీలో ఏపీ భవన్ నిజాం కాలం నాటిదని.. అందుకే ఆ భవనాన్ని తమకు ఇచ్చేలా నిర్ణయం తీసుకోవాలన్న కేసీఆర్ మాటను తప్పు పట్టిన గాలి.. హైదరాబాద్ లోని సచివాలయం.. విశ్వవిద్యాలయాలు.. ఫ్లైఓవర్లు..పార్కులు.. ఇంకాఎన్నో ప్రాజెక్టులు ఏపీకి చెందిన తెలంగాణ.. కాంగ్రెస్ నేతల హయాంలో నిర్మించారని.. మరి వాటి లెక్క కట్టి ఏపీకి ఇస్తారా? అంటూ ప్రశ్నించారు.

అర్థం లేని మాటలు చెప్పటం ఆపాలంటూ కేసీఆర్ కు చురకలు వేసిన ముద్దుకృష్ణమ.. భాషా ప్రాతిపదికన ఏపీకి చెందిన నాలుగు జిల్లాల్ని తాము వదులుకున్న విషయాన్ని ఈసందర్భంగా గుర్తు చేశారు. తాను కోరుకున్నది తనకు దక్కకుంటే తీవ్రంగా అసహనం చెందే కేసీఆర్ కు తాజాగా గాలి ముద్దుకృష్ణమ తరహాలో ప్రశ్నలు వేసే వారిపై ఆయన ఎంత అసహనపడతారో..?