అమెరికాలోని భారత విద్యార్థులకు స్వీట్ న్యూస్

కరోనా పుణ్యమా అని ప్రపంచానికే పెద్దన్న అయిన అమెరికా పరిస్థితి ఎంత దారుణంగా ఉందో ప్రత్యేకంగా చెప్పాల్సిన అవసరమే లేదు. ఎప్పుడూ లేనంతగా ఆహార కొరతను ఆ దేశ ప్రజలు పలువురు ఎదుర్కొంటున్నారు. రోజువారీ జీవితంలో ఫుడ్ బ్యాంకుల వైపు కన్నెత్తి చూడని వారు సైతం.. ఇప్పుడు కిలోమీటర్ల కొద్దీ క్యూ బారుల్లో నిలుచుంటే.. తమకు అవకాశం వచ్చే వరకూ గంటల కొద్దీ వెయిట్ చేస్తున్నారు. కరోనాతో భారీగా ప్రభావితమైన దేశాల్లో అమెరికా తొలి స్థానంలో నిలుస్తుందని చెప్పాలి.

అగ్రరాజ్యంలోని అమెరికన్లకే ఇలాంటి ఇబ్బందికర పరిస్థితులు నెలకొని ఉన్నవేళ.. ఆ దేశంలో ఉండే భారత విద్యార్థుల పరిస్థితి ఏమిటి? అన్నదిప్పుడు ప్రశ్నగా మారింది. కరోనా కారణంగా ఎన్నో మార్పులు చేసుకొని.. తీవ్రమైన ఒత్తిడిలో ఉన్న భారత విద్యార్థులకు అమెరికా ప్రభుత్వం గుడ్ న్యూస్ చెప్పింది.

అమెరికా సిటిజెన్ షిప్ అండ్ ఇమ్మిగ్రేషన్ సర్వీసెస్ విడుదల చేసిన తాజా ప్రకటన ప్రకారం.. పలు కొత్త సూచనలు చేసింది. పాత నిబంధనల్ని సడలించింది. ఆన్ క్యాంపస్ ఉద్యోగం కోల్పోయి ఆర్థిక ఇబ్బందులు పడుతున్న వారిప్పుడు ఆఫ్ క్యాంపస్ లో ఉద్యోగం చేసుకునేందుకు అప్లై చేసుకోవచ్చన్న వెసులుబాటు ఇచ్చారు. అయితే.. ఇందుకు కొన్నినిబంధనల్ని పాటించాలని పేర్కొన్నారు.

ఆఫ్ క్యాంపస్ లో ఉద్యోగం చేయటం కోసం.. వర్సిటీ నుంచి అనుమతి పత్రం తీసుకోవాల్సి ఉంటుంది. ఈ నిర్ణయం పుణ్యమా అని.. ఆర్థిక ఇబ్బందుల్లో ఉన్న వారికి గొప్ప ఉపశమన చర్యగా ప్రభుత్వ నిర్ణయాన్ని భావిస్తున్నారు. తాజా వెసులుబాటు తీసుకునే వారు కోర్సు పూర్తయ్యే కాలంలో ఏడాది పాటు ఆఫ్ క్యాంపస్ వర్క్ చేయొచ్చని పేర్కొంది. ఈ నిర్ణయంతో అమెరికాలో చిక్కుకున్న విదేశీ విద్యార్థులకు పెద్ద ఎత్తున మేలు చేస్తుందని చెబుతున్నారు. అగ్రరాజ్యం తీసుకున్న తాజా నిర్ణయం భారత విద్యార్థులకు గుడ్ న్యూస్ గా చెప్పకతప్పదు.