ఈ ఒక్కసీటు.. టీడీపీలో కొట్టుకుంటున్నారు..

టీడీపీలో ఇప్పుడు ఈ ఒక్క సీటు కోసం పోటీ పెరిగిపోయింది. ఒకవైపు సిట్టింగ్ ఎమ్మెల్యే , మరో వైపు బలమైన జేసీ సోదరులు, మరో వైపు ముస్లిం మైనార్టీ వర్గం, ఇంకోవైపు మేయర్ కూడా టికెట్ కోసం టీడీపీలో రచ్చ చేస్తున్నారు. ఎవ్వరికి సీటు ఇచ్చినా ఓడిస్తామని టీడీపీ అధినేతకు అల్టీమేటం జారీ చేస్తున్నారు. దీంతో అనంతపురంలో సీట్ల కొట్లాట తారాస్థాయికి చేరింది.

అనంతపురం సిట్టింగ్ ఎమ్మెల్యే ప్రభాకర్ చౌదరికి సొంత పార్టీ నేతల నుంచే తీవ్రమైన పోటీ నెలకొంది. ఇక్కడ ఈయనకు సిట్టింగ్ ఎంపీ జేసీ దివాకర్ రెడ్డికి మధ్య విభేదాలు తారాస్థాయికి వెళ్లాయి. నాలుగేళ్లుగా ఇరు వర్గాలు కొట్టుకుంటూ తిట్టుకుంటూ వీధిన పడుతున్నారు.

ఈ లొల్లి చాలదన్నట్టు ఇప్పుడు అసెంబ్లీ ఎన్నికల వేళ.. చాలా మంది అనంతపురం అసెంబ్లీ సీటు కోసం ఫైట్ మొదలు పెట్టారు. జేసీ సోదరులు సిట్టింగ్ ఎమ్మెల్యే ప్రభాకర్ చౌదరి అభ్యర్థిత్వాన్ని వ్యతిరేకిస్తున్నారు. జేసీ ఫ్యామిలీయే అనంతపురం టికెట్ ను ఆశిస్తోంది.

ఇక మైనార్టీ వర్గం నుంచి గతంలో అనంతపురం ఎమ్మెల్యేగా పోటీచేసి ఓడిపోయిన సైఫుల్లా ఫ్యామిలీ ఈసారి తమకే సీటు కావాలంటోంది. ఓడిపోయిన మనస్థాపంలో సైపుల్లా ఆత్మహత్య చేసుకోగా.. ఆయన కుమారులు ఇప్పుడు టికెట్ తమకే కావాలంటున్నారు. మైనార్టీలు ఎక్కువగా అనంతపురంలో ఉండడంతో టికెట్ కోసం లాబీయింగ్ మొదలు పెట్టారు. ప్రభాకర్ చౌదరికి ఇస్తే ఓడిస్తామంటున్నారు.ఇక అనంతపురం మేయర్ స్వరూపా కూడా తన వంతు ప్రయత్నాలు చేస్తోంది. ఇలా ఒక్క అనంతపురం సీటు కోసం చాలా మంది పోటీపడుతూ టీడీపీలో దుమారం రేపుతోంది. ఇక్కడ బాబు ఎవరికి సీటు ఇచ్చినా ఓడించడానికి రెడీ అవ్వడం టీడీపీని కలవరపెడుతోంది.