హేమమాలిని 'బెంజ్ ' ప్రచారం.. వైరల్

పాతతరం బాలీవుడ్ నాయకిగా ఎంతో పేరు ప్రఖ్యాతలు పొందిన హేమామాలిని.. ఆ తర్వాత రాజకీయాల్లోకి చేరి రాణిస్తున్నారు. ప్రస్తుతం హేమామాలిని ఉత్తరప్రదేశ్ లోని మధుర సీటునుంచి ఎంపీగా ఈ ఎన్నికల్లో పోటీచేస్తున్నారు.. ప్రచారానికి వెళ్లేటప్పుడు ఏ నేత అయినా సాదాసీదాగా వెళుతూ జనంలో మమేకమవుతూ వారిలో కలిసిపోతారు. కానీ హేమామాలిని మాత్రం హైఎండ్ ఖరీదైన బెంజ్ కారులో ప్రచారానికి రావడం అందరినీ ఆశ్చర్యపరిచింది.

వివిధ పార్టీలు - ఫంక్షన్లకు వెళ్లేటప్పుడు హోదా కోసం ఖరీదైన కార్లు - బట్టలు - హైఎండ్ గా వెళ్లడం మామూలే.. కానీ సామాన్యులైన పేదలు - ప్రజల వద్దకు ఇలా విలాసవంతమైన కార్లలో హేమామాలిని రావడం చూసి జనం ముక్కున వేలేసుకుంటున్నారు. ఈ సందర్భంగా హేమామాలిని ఎండలో పనిచేస్తున్న రైతుల వద్దకు ఈ బెంజ్ కారులో వెళ్లి ఓట్లు అడిగారు. ఈ ఫొటోలు - వీడియోలు ఇప్పుడు సోషల్ మీడియాలో వైరల్ గా మారాయి. బెంజ్ కారులో ప్రచారానికి వెళతావా అని నెటిజన్లు హేమామాలినిని ట్రోల్ చేస్తున్నారు. ఓ పక్క పంటను మోసుకెళ్తున్న రైతులను - మరోపక్క బెంజ్ కారులో ఉన్న హేమామాలిని ఫొటోలను షేర్ చేస్తూ నెటిజన్లు ఆడుకుంటున్నారు.

అయితే హేమామాలిని మద్దతుగా మాట్లాడిన వాళ్లు కూడా సోషల్ మీడియాలో ఉన్నారు. 50 ఏళ్లుగా బాలీవుడ్ లో ఎంతో కష్టపడి పైకొచ్చిన వారు హేమామాలిని అని.. అలాంటి ఖరీదైన కార్లను ఉపయోగించుకునే హక్కు ఆమెకు ఉంటుందని సపోర్టుగా నిలుస్తున్నారు. అయితే సినిమాల్లో భారీదనం ఉంటే అది సినీ ప్రముఖులకు మేలు చేస్తుంది.. కానీ రాజకీయాల్లోకి వచ్చాక జనంతో మమేకమైనప్పుడు అదే రిచ్ నెస్ మెయింటేన్ చేస్తే మాత్రం ఓట్లు పడవనే విషయాన్ని హేమామాలిని గుర్తిస్తే మంచిదని విశ్లేషకులు అభిప్రాయపడుతున్నారు.