'పెద్ద నోట్ల' ను పల్లీల లెక్కన అమ్ముతున్నారట

ప్రధాని తీసుకున్న సంచలన నిర్ణయంతో దేశం మొత్తం ఆగమాగం అయ్యే పరిస్థితి. దేశ వ్యాప్తంగా ప్రజలు ఇప్పుడు మిగిలిన విషయాల్ని పట్టించుకోవటమే మానేశారు. ఇప్పుడు ఏ ఇద్దరు కలిసినా పెద్దనోట్ల రద్దు గురించిన చర్చే. ఇక.. ప్రతిఒక్కరి వాట్సప్ మెసేజ్ ల విషయానికి వస్తే ప్రతి ఐదు మేసేజ్ లలో హీనపక్షంలో నాలుగు మెసేజ్ లు పెద్దనోట్ల రద్దుకు సంబంధించినవే కావటం గమనార్హం.

ఇదిలా ఉంటే.. ఇళ్లల్లో మూలుగుతున్న పెద్ద నోట్లను ఏం చేయాలో అర్థం కాని చాలామంది నల్ల కుబేరులు..వాటిని వదిలించుకునేందుకు రకరకాల ప్రయత్నాలు చేస్తున్నారు. కొందరు మూటలు కట్టి కాల్చేస్తుంటే.. మరికొందరు తెలిసిన బంధువుల్ని.. పరిచయస్తుల్ని పిలిచి వారికి డబ్బులు ఇచ్చి వాటిని మార్చి ఇవ్వాల్సిందిగా కోరుతున్నారు. ఇందుకోసం ఉదారంగా కొంత మొత్తాన్ని ఆఫర్ చేస్తున్న వైనాలు బయటకు వస్తున్నాయి.

ఇదిలా ఉండగా.. బాలీవుడ్ హీరో ఒక విచిత్ర ఘటనకు సంబంధించిన అంశాన్ని షూట్ చేసి ట్విట్టర్ లో పోస్ట్ చేశారు. ఇంతకీ ఆయన పోస్ట్ చేసిన వీడియో ఏమిటో తెలుసా? ఒక వ్యక్తి పళ్లెంలో రూ.500.. రూ.వెయ్యి నోట్లను పెట్టుకొని బజార్లో పెద్దపెద్ద కేకలు వేస్తూ అమ్మేయటం కనిపిస్తుంది. మనకు నిత్యం పల్లీల్ని ఏ లెక్కన అయితే వీధుల్లో అమ్మటం చూస్తామో.. దాదాపుగా అదే తరహాలో మరాఠీలో అమ్ముతున్న వైనాన్ని పోస్ట్ చేశారు. ఇప్పుడు ఈ వీడియో వైరల్ గా మారింది.