కరోనా కష్టాలు.. మెట్రోకు బోలెడు నష్టాలు.. గట్టేక్కేదెలా?

కరోనా వైరస్‌ మహానగరమైన హైదరాబాద్‌నూ అతలాకుతలం చేసింది.లాక్‌డౌన్‌లో పరిస్థితులు పూర్తిగా తలకిందులయ్యాయి. వైరస్‌ కష్టాలతో చాలా మంది సిటీని వదిలి వెళ్లిపోయారు. ఇంకా చాలా మంది ఉద్యోగాలు కోల్పోయా ఊళ్ల బాట పట్టారు. కరోనా ప్రభావం రోజురోజుకూ పెరగడంతో రోడ్లపై జనం కనిపించడం మానేశారు. కరోనా కొన్ని నెలల పాటు ఖాళీగా కనిపించిన సిటీ ఇప్పుడు రీ లోడెడ్‌ అయింది.

షాపింగ్‌ మాల్స్‌ తెరుచుకోవడం.. మెట్రో సర్వీసులు ప్రారంభం కావడం.. సిటీ బస్సులు బస్సులూ రోడ్డెక్కడంతో నగరంలో ట్రాఫిక్‌ యథా స్థితికి చేరింది. మొన్నటి వరకూ తక్కువ వాహనాలతో చటుక్కున గమ్య స్థానాలకు చేరుకునే పరిస్థితి ఉండేది. కానీ.. ఇప్పుడు యథా రాజా తథా ప్రజా అన్నట్లుగా తయారైంది. ప్రధాన కూడళ్లు వాహనాలతో కిక్కిరిసిపోతున్నాయి. ఇన్నాళ్లు ట్రాఫిక్‌ బాధల నుంచి ఉప శమనం పొందిన వాహనదారులంతా తాజా పరిస్థితితో మళ్లీ కష్టాలు మొదలయ్యాయి అంటూ తలలు బాదుకుంటున్నారు.

కరోనా వైరస్ కట్టడిలో భాగంగా విధించిన లాక్‌డౌన్‌తో అనేక వ్యాపార రంగాలు మూతబడ్డాయి. కొన్ని రంగాలు తీవ్ర నష్టాలను చవిచూసి శాశ్వతంగా రద్దు చేసుకునే పరిస్థితులు తలెత్తాయి. చాలా మంది చిరుద్యోగులు ఉద్యోగాలు కోల్పోవడంతో అగమ్యగోచరంలో పడిపోయారు. ఏదైనా పనిచేస్తేనే గాని జీవించలేని పరిస్థితిలో ఉన్న అనేక మంది నగరాన్ని విడిచి సొంత గ్రామాలకు తరలి వెళ్లిపోయారు. 30 లక్షల వరకు జనాభా వెళ్లిపోయింది. దీంతో నగరం చాలా వరకూ ఖాళీగా కనిపించింది. రానురాను పరిస్థితుల్లో మార్పులు చోటుచేసుకుంటున్నాయి. ఉపాధి లేక ఊరెళ్లిపోయిన వారు మళ్లీ సిటీకి చేరుకుంటున్నారు. పరిశ్రమలు, వ్యాపార కార్యక్రమాలు గాడిన పడుతుండడంతో ఉపాధి కోసం వస్తున్నారు.

ఇటీవలే సిటీ బస్సులు కూడా ప్రారంభం కావడంతో రోడ్లన్నీ మళ్లీ జనసాంద్రతతో కనిపిస్తున్నాయి. నగరంలోని ప్రధాన కూడళ్లు అయిన ఎల్బీనగర్, నాగోల్, ఉప్పల్, హబ్సిగూడ, పాట్నీ సెంటర్, బేగంపేట, పంజాగుట్ట, మైత్రీవనమ్, యూసఫ్ గూడ సర్కిల్, జూబ్లీ చెక్ పోస్ట్, హైటెక్ సిటీ, ఖైరతాబాద్, రవీంద్ర భారతి జంక్షన్, నాంపల్లి, కోటి తదితర కూడళ్లలో ట్రాఫిక్ సమస్య సర్వసాధారణంగా కనిపిస్తోంది. నగరాన్ని ఖాళీ చేసి వెళ్లిన అనేక మంది జీవనోపాధికోసం మళ్లీ హైదరాబాద్ తలుపు తట్టడం నగరం యొక్క గొప్పతనం అర్థమవుతోంది.

కరోనా ఎఫెక్ట్ తో హైదరాబాద్ మెట్రో ఆర్థిక ఇబ్బందుల్లో పడింది. చాలా మంది కరోనా దెబ్బకు మెట్రో రైలు ఎక్కకుండా సొంత వాహనాలు వాడేస్తున్నారు. దీంతో మెట్రో సంస్థ నష్టపోతోంది. భారీ ఎత్తున ఆదాయన్ని కోల్పోతోంది. ఏడాదిన్నరగా ప్రయాణికుల సంఖ్య తగ్గిపోవడంతోపాటు కమర్షియల్ స్పేస్ నుంచి ఆశించిన ఆదాయం రావడం లేదు. రోజురోజుకు నష్టాల భారం పెరిగి చివరకు నిర్వహణ భారంగా మారే పరిస్థితి వచ్చింది.

ఈ క్రమంలోనే మొత్తంగా కమర్షియల్, నాన్ కమర్షియల్ డిబెంచర్స్ జారీ చేయడం ద్వారా మొత్తంగా రూ.13600 కోట్ల నిధులు సమీకరించాలని మెట్రో సంస్థ ఎల్.అండ్ టీ నిర్ణయించినట్టు సమాచారం. ప్రస్తుతం మెట్రో రైలుకి రూ.1767 కోట్ల నష్టాల్లో ఉంది. ఇందులో 382 కోట్ల నష్టం గత ఏడాది కాలంలో వచ్చిందే.