హైదరాబాద్ లో జాబ్ సెక్యూరిటీ అంతంతేనట..

ఐటీ సంస్థల్లో ఉద్యోగాలు పోతున్నాయ్.. ఎవరి ఉద్యోగం ఎప్పుడు ఊడుతుందో తెలియని పరిస్థితి. ఒక్క ఐటీ ఏంటి.. చాలా రంగాల్లో అదే పరిస్థితి. అయితే.. దేశమంతా ఇలాగే ఉందా..? ఎక్కడెక్కడ ఇలాంటి ధోరణి ఎక్కువగా ఉందనే విషయంలో తాజాగా ఓ సంస్థ సర్వే చేసింది. ఆ సర్వే ప్రకారం జాబ్ సెక్యూరిటీ బాగా తక్కువగా ఉన్న సిటీల్లో ఢిల్లీ అగ్రస్థానంలో ఉంది. తెలుగు రాష్ర్టాల రాజధానిదీ దాదాపు అదే పరిస్థితి. ఈ జాబితాలో హైదరాబాద్ మూడో స్థానంలో ఉంది. బెంగుళూరు రెండో స్థానంలో ఉంది.

సంస్థ ఆర్థిక పరిస్థితి బాగులేదని.. ఉద్యోగి పనితీరు బాగులేదని రకరకాల కారణాలు చెప్తూ తొలగిస్తున్నారట. టైర్-1 సిటీలతో పోలిస్తే దేశ రాజధాని ఢిల్లీలో పని చేసే వారికి ఉద్యోగ భద్రత చాలా తక్కువగా ఉందని తేలింది. అహ్మదాబాద్ - బెంగళూరు - చండీగఢ్ - చెన్నై - ఢిల్లీ - హైదరాబాద్ - కోల్ కతా - ముంబయి - పూణెలలో ఈ సర్వే చేశారు. నగరం - సెక్టార్ - ప్రొఫైల్ ఇతర అంశాలను పరిగణనలోకి తీసుకుని రూపొందించిన నివేదికల ఆధారంగా ఆశ్చర్యకరమైన విషయాలు సర్వేలో వెల్లడయ్యాయి.

ఉద్యోగ భద్రత తక్కువగా ఉన్న నగరాల్లో హైదరాబాద్ మూడో స్థానంలో ఉండగా అహ్మదాబాద్ - ముంబై - చండీగఢ్ - చెన్నై - కోల్ కతా - పుణెలది ఆ తరువాత ప్లేస్. ఉద్యోగ భద్రత లేకపోవడమనేది ఆయా ఇండస్ట్రీల బట్టి కూడా ఉంటోంది. ఇండస్ట్రియల్ మాన్యుఫాక్చరింగ్ - అలైడ్ సెక్టార్స్ లో పని చేసే ఉద్యోగులు తమ ఉద్యోగాలను పోగొట్టుకునే అవకాశాలు ఎక్కువగా ఉన్నాయి. ఆ తర్వాతి స్థానాల్లో కన్ స్ట్రక్షన్ అండ్ రియల్ ఎస్టేట్ - బీపీఓ అండ్ ఐటీ రంగాల్లో సేవలందించే సంస్థలు ఉన్నాయి. హెల్త్ కేర్ - టెలికామ్ రంగాల్లో పని చేసే వారు నిర్భయంగా పని చేసుకుంటున్నారట. అక్కడ జాబ్ సెక్యూరిటీ బాగా ఉందని ఈ సర్వే చెప్తోంది.

Like Us on Facebook : https://www.facebook.com/Tupakidotcom/