ఏపీలోకి అక్రమ మద్యం.. ఎలా తరలుతుందో తెలిసా?

కాదేది ఏపీలోకి మద్యం తరలించడానికి అనర్హం అన్నట్టుగా పరిస్థితి తయారైంది. రోజుకో రకంగా ఏపీలోకి అక్రమంగా మద్యం తరలుతోంది. అంబులెన్స్ లో, చేపలు తరలించే వ్యాన్లలో.. బియ్యం బస్తాల్లో, ఖాళీ గ్యాస్ సిలిండర్లలో, ఒంటికి ప్లాస్టర్లు అంటించుకొని కొందరు.. ఇలా రోజుకో రకంగా తరలిస్తున్నా ఎక్కడో ఒకచోట దొరుకుతూనే ఉన్నారు.

ఏపీలో మధ్యపాన నిషేధం దిశగా జగన్ సర్కార్ మద్యం ధరలను భారీగా పెంచేసింది. దీంతోపాటు మంచి బ్రాండెడ్ మద్యం ఏపీలో దొరకడం లేదట.. దీంతో మద్యానికి ఏపీలో ఫుల్ డిమాండ్ ఏర్పడింది. ఆ క్రమంలోనే ఏపీకి పక్క రాష్ట్రాల నుంచి మద్యం పోటెత్తుతోంది.

తాజాగా మరో కొత్త మార్గం బయటపడింది. కృష్ణా జిల్లా కంచికచర్ల పోలీసుల తనిఖీల్లో భారీ మొత్తంలో అక్రమంగా తరలిస్తున్న మద్యం పట్టుబడింది. పాల వ్యాన్ లో మద్యం తరలిస్తూ ఉండగా అధికారులు పట్టుకున్నారు. పాలవ్యాన్ ని కూడా అధికారులు స్వాధీనం చేసుకొని ఇద్దరు వ్యక్తులను అదుపులోకి తీసుకున్నారు. వారిని ఉయ్యూరు పోలీస్ స్టేషన్ కి తరలించారు. కేసు నమోదు చేసి దర్యాప్తు చేస్తున్నారు.

ఇప్పటికే ఈ అక్రమ రవాణాను అరికట్టడానికి తెలంగాణ సరిహద్దుల్లో పోలీసులు పటిష్ట చర్యలు చేపట్టారు. కానీ అధికారుల కళ్లుగప్పి ఇలా రోజుకో విధంగా మద్యం తరలించేందుకు అక్రమార్కులు కొత్త పుంతలు తొక్కుతున్నారు. ఏపీలోకి భారీగా మద్యం అక్రమ రవాణా చేస్తున్నారు.