క్రిమినల్ చర్యల నుండి చెక్ బౌన్స్ కు మినహాయింపు !

మహమ్మారి కారణంగా విధించిన లాక్ డౌన్ తో తీవ్రమైన సంక్షోభంలో తల్లడిల్లుతున్న వ్యాపార వర్గాలకు కాస్త ఊరటనిచ్చే దిశగా కేంద్ర ప్రభుత్వం మరిన్ని చర్యలు తీసుకుంటోంది. ఇందులో భాగంగా చిన్న చిన్న ఉల్లంఘనలను క్రిమినల్‌ చర్యల పరిధి నుంచి తప్పించడంపై దృష్టి సారించింది.చెక్ బౌన్స్, రుణ వాయిదాల చెల్లింపుల్లో విఫలం కావడం వంటి చిన్నపాటి వాటిని ఆర్థిక నేరాలుగా భావించవద్దని, వాటికి శిక్షలు వేయవద్దని ఆర్థిక శాఖ ప్రతిపాదన చేసింది. వీటితో పాటు 19 చట్టాల్లోని చిన్నపాటి నేరాలకు శిక్షలు తొలగించాల్సిందిగా ప్రతిపాదించింది.

వీటిపై సంబంధిత వర్గాలు జూన్‌ 23లోగా తమ అభిప్రాయాలు తెలపాల్సి ఉంటుంది. వీటి ఆధారంగా నిర్దిష్ట సెక్షన్‌ పరిధిలో ఏ నేరాలను క్రిమినల్‌ నేరాల కింద కొనసాగించాలి, వేటిని డీక్రిమినలైజ్‌ చేయొచ్చు అన్నది ఆర్థిక సర్వీసుల విభాగం నిర్ణయం తీసుకుంటుంది. చిన్న నేరాలను డీక్రిమినలైజ్‌ చేయడమనేది వ్యాపారాలకు సులభతరమైన పరిస్థితులు కల్పించే దిశగా ఎంతగానో తోడ్పడుతుంది. న్యాయవ్యవస్థలు, జైళ్లపై ఒత్తిడి తగ్గగలదు అని ఆర్థిక శాఖ ఒక ప్రకటనలో తెలిపింది.

వైరస్ కారణంగా వ్యాపార నిర్వహణ సంక్లిష్టంగా మారింది. దీంతో వ్యాపార, పారిశ్రామిక రంగాలకు ఊరటనిచ్చేలా, ఆర్థికపరమైన అంశాల్లో వారిపై ఉన్న ఒత్తిడిని తగ్గించే దిశగా కేంద్రం చర్యలు తీసుకుంటోంది. ప్రస్తుతం నేరాలుగా పరిగణించబడుతున్న వాటిని డీక్రిమినలైజ్ చేస్తూ 19 చట్టాల్లో ఆర్థిక మంత్రిత్వ శాఖ సవరణలను ప్రతిపాదించింది. వీటిలోని పలు సెక్షన్లను తొలగించాల్సిన అవసరముందని అభిప్రాయపడింది. 23వ తేదీలోగా స్పందన తెలియజేసిన తర్వాత ఆర్థిక సేవల శాఖ ఓ నిర్ణయానికి వస్తుంది. ఆత్మనిర్భర్ భారత్ ప్యాకేజీ సందర్భంగా ఈ చట్టాల సవరణను ఆర్థికమంత్రి నిర్మలా సీతారామన్ ప్రస్తావించారు. మందగమనం, వైరస్-లాక్ డౌన్‌ తో ఇబ్బందుల్లో ఉన్న వ్యాపార, పారిశ్రామిక రంగాలకు కొన్ని సెక్షన్లు మరిన్ని సమస్యలు తెచ్చేలా ఉన్నాయని చెప్పారు. అలాంటి వాటిని ఇప్పుడు సవరించేందుకు మొగ్గు చూపుతున్నారు.

ప్రస్తుతం నెగోషియబుల్‌ ఇన్‌స్ట్రుమెంట్స్‌ యాక్ట్‌ 1881లోని సెక్షన్‌ 138 కింద ఖాతాలో తగిన బ్యాలెన్స్‌ లేక చెక్‌ బౌన్స్‌ అయితే దాన్ని జారీ చేసిన వ్యక్తి నేరం చేసినట్లుగా పరిగణించి రెండేళ్ల దాకా జైలు శిక్ష లేదా చెక్‌ పరిమాణానికి రెట్టింపు పెనాల్టీ విధించవచ్చు. లేదా జైలుశిక్ష, జరిమానా రెండూ విధించవచ్చు. తాజా ప్రతిపాదనల ప్రకారం దీన్ని సవరించే అవకాశం ఉంది.

సవరణలు ప్రతిపాదించిన చట్టాలు :
నెగోషియబుల్‌ ఇన్‌స్ట్రుమెంట్స్‌ (చెక్‌ బౌన్స్‌)
సర్ఫేసీ (బ్యాంకు రుణాల రీపేమెంట్‌పరమైన ఉల్లంఘనలు)
ఎల్‌ఐసీ ళీ పీఎఫ్‌ఆర్‌డీఏ ళీ ఆర్‌బీఐ
ఎన్‌హెచ్‌బీ ళీ బ్యాంకింగ్‌ నియంత్రణ
చిట్‌ ఫండ్స్‌ ళీ యాక్చువేరీస్‌
జనరల్‌ ఇన్సూరెన్స్‌ బిజినెస్‌ (జాతీయీకరణ)
అనియంత్రిత డిపాజిట్‌ స్కీముల నిషేధ చట్టం
డీఐసీజీసీ ళీ నాబార్డ్‌ ళీ బీమా చట్టం
ప్రైజ్‌ చిట్స్, మనీ సర్క్యులేషన్‌ స్కీమ్స్‌ (నిషేధ)
పేమెంట్‌ అండ్‌ సెటిల్మెంట్స్‌ సిస్టమ్స్‌ యాక్ట్‌
స్టేట్‌ ఫైనాన్షియల్‌ కార్పొరేషన్స్‌
క్రెడిట్‌ ఇన్ఫర్మేషన్‌ కంపెనీస్‌ (నియంత్రణ)
ఫ్యాక్టరింగ్‌ నియంత్రణ చట్టం