సీఎం ర‌మేష్ ఇంటిపై నెటిజ‌న్ల కామెంట్స్!

అది ఓ ఇంద్ర‌భ‌వ‌నాన్ని త‌ల‌పించే బంగ్లా....బ‌య‌ట నుంచి చూస్తే అత్యంత ఆక‌ర్ష‌ణీయంగా....క‌ళ్లు మిరిమిట్లు గొలిపేలా ఉంటుంది. లోపలికెళ్తే అత్యంత విలాస‌వంతంగా....అధునాత‌న సౌక‌ర్యాల‌తో రాజ‌భ‌వ‌నాన్ని త‌ల‌పిస్తుంది. విశాల‌మైన గ‌దులు.....లేటెస్ట్ టెక్నాలజీ ఉన్న‌ హోంథియేటర్‌, స్విమ్మింగ్ ఫూల్‌, డైనింగ్‌ టేబుల్‌, బెడ్ రూం, ఇంపోర్టెడ్ ఇంటీరియ‌ర్ డిజైన్లు...అవ‌న్నీ చూస్తే ఆ ఇల్లు క‌చ్చితంగా ముకేశ్ అంబానీదో అనుకునే ఆస్కార‌ముంది. కానీ, మీర‌నుకుంటున్న‌ట్లు ఆ ఇల్లు అంబానీది కాదు... ప్ర‌ముఖ పారిశ్రామిక వేత్త‌, టీడీపీ రాజ్యసభ సభ్యులు సీఎం రమేష్ ఆ ఇంటికి య‌జ‌మాని. సీఎం ర‌మేష్ ఇళ్లు, ఆఫీసులపై ఐటీ సోదాలు జ‌రుగుతోన్న నేప‌థ్యంలో సీఎం ర‌మేష్ విలాస‌వంత‌మైన ఇంటి ఫొటోలు సోష‌ల్ మీడియాలో వైర‌ల్ అవుతున్నాయి. ఆ ఖ‌రీదైన భ‌వంతి, అందులోని సౌక‌ర్యాల‌పై నెటిజ‌న్లు కామెంట్స్ చేస్తున్నారు.

ఏపీ సీఎం చంద్ర‌బాబు నాయ‌డుకు అత్యంత స‌న్నిహితుడు, రాజ్య‌స‌భ ఎంపీ సీఎం ర‌మేష్ కు చెందిన కంపెనీలు, పలుచోట్ల ఉన్న ఇళ్లు, కార్యాలయాలలో ఐటీ అధికారులు శుక్రవారం సోదాలు నిర్వహించిన విషయం తెలిసిందే. దీంతో, సీఎం ర‌మేష్ పై కేంద్రం క‌క్ష‌పూరితంగా ఐటీ దాడులు జ‌రుపుతోందంటూ టీడీపీ నేత‌లు ఆరోపిస్తున్నారు. ఈ సోదాల నేపథ్యంలో సీఎం ర‌మేష్ బిజినెస్, వ్యక్తిగత ఆస్తుల వివరాల గురించి నెటిజ‌న్లు శోధిస్తున్నారు. ఈ క్ర‌మంలోనే ర‌మేష్ విలాసవంత‌మైన ఇంటి ఫొటోలు సోషల్‌ మీడియాలో వైరల్‌ అయ్యాయి. హైదరాబాద్ లోని జూబ్లిహిల్స్‌లో ఉన్న సీఎం ర‌మేష్ నివాసానికి సంబంధించిన ఫొటోలు నెట్టింట్లో చక్కర్లు కొడుతున్నాయి. బిలియ‌నీర్ల రేంజ్ లో రమేష్ ఇల్లు నిర్మించుకున్నార‌ని నెటిజ‌న్లు కామెంట్స్ చేస్తున్నారు. ఈ ఫొటోలు చూసి అంబానీ ఇంటివ‌నుకున్నామ‌ని కొంద‌రు అభిప్రాయ‌ప‌డుతున్నారు.