వ్యాక్సిన్​ వచ్చింది సరే..! ఇండియాలో ఎప్పుడిస్తారు?

కరోనా వ్యాక్సిన్​పై ఇప్పుడు ప్రపంచవ్యాప్తంగా చర్చ నడుస్తోంది. అందరికంటే ముందే వ్యాక్సినేషన్​ ప్రారంభించి రష్యా సంచలనం సృష్టించింది. అయితే అమెరికా, బ్రిటన్​, కెనడా, ఇజ్రాయెల్​ సహా మరికొన్ని దేశాల్లో ఇప్పటికే వ్యాక్సిన్​ పంపిణీ ప్రారంభించారు. అమెరికా తీసుకొచ్చిన ఫైజర్​ వ్యాక్సిన్​ మిగతా అన్ని వ్యాక్సిన్ల కంటే ప్రభావవంతంగా పనిచేస్తుందని టాక్​. బ్రిటన్​లో ఇప్పటికే ఆరులక్షల మందికి ఫైజర్​ వ్యాక్సిన్​ ఇచ్చినట్టు టాక్​. అన్ని దేశాల్లో ముందుగా ఫ్రంట్​లైన్​ వారియర్స్​కే వ్యాక్సిన్లు ఇస్తున్నారు. ఈ క్రమంలో మనదేశంలో వ్యాక్సిన్​ ఎప్పుడు పంపిణీ చేస్తారన్న విషయం చర్చనీయాంశం అయ్యింది.

వ్యాక్సినేషన్​ కోసం సిద్ధంగా ఉండాలంటూ ఇప్పటికే కేంద్ర ప్రభుత్వం ఆయా రాష్ట్రాలకు ఆదేశాలు జారీ చేసింది కూడా. అయితే యూరప్​లో వ్యాక్సినేషన్​ ప్రక్రియ చాలా వేగంగా సాగుతోంది. యూరోపియన్​ యూనియన్​లోని దాదాపు 10 దేశాలు ఫైజర్​ వ్యాక్సిన్​ డోసుల కోసం ఆర్డర్లు ఇచ్చాయి. మరోవైపు మనదేశంలోకి ఫైజర్​ వ్యాక్సిన్​ తీసుకురావడం సాధ్యపడకపోవచ్చని శాస్త్రవేత్తలు అంటున్నారు. ఎందుకంటే ఈ వ్యాక్సిన్​ ఓ నిర్ణీత ఉష్ణోగ్రత వద్ద భద్రపరచవలసి ఉంటుంది. అది ఖర్చుతో కూడుకున్న వ్యవహారం. అయితే ఫైజర్​ వ్యాక్సిన్​తో పాటు సనోఫీ-గ్లాక్సోస్మిత్‌క్లైన్, ఆస్ట్రాజెనెకా, జన్‌సెన్ ఫార్మాసూటికా ఎన్‌వీ, క్యూర్ వ్యాక్, మోడెర్నా వ్యాక్సిన్లు కూడా అనుమతుల కోసం వేచిచూస్తున్నాయి.

మనదేశంలో భారత్​బయోటెక్​ కోవాక్జిన్​ను సీరం ఇన్​స్టిట్యూట్​ మరో వ్యాక్సిన్​ను తయారు చేస్తున్నాయి. దీంతో పాటు రష్యా తయారుచేసిన స్పుత్నిక్​​ వీ వ్యాక్సిన్​ ను మనదేశంలో రెడ్డి ల్యాబ్స్​ అందుబాటులోకి తేనున్నది. వీటి క్లినికల్​ ట్రయల్స్​ పూర్తయ్యాక మనదేశంలోనూ వ్యాక్సినేషన్ మొదలుపెట్టే అవకాశం ఉన్నది. వ్యాక్సిన్​ పంపిణీ ఇంకా పూర్తికాకముందే ... యూకేలో కొత్త స్ట్రెయిన్​ కలకలం పుట్టిస్తున్నది. వ్యాక్సిన్లు ఈ జన్యుమార్పిడి చెందిన కరోనా వైరస్​ను ఎదుర్కొగలవా లేదా? అన్న విషయంపై ఇంకా క్లారిటీ లేదు. ఈ నేపథ్యంలో మనదేశంలో వ్యాక్సిన్​ ఎప్పుడు అందుబాటులోకి వస్తుందో వేచి చూడాలి.