ఇండియన్ క్రికెట్ ఫ్యాన్స్..ఈ వీడియో చూశారా?

మౌకా మౌకా.. ఈ మాటెత్తితే భారత క్రికెట్ అభిమానుల్లో ఎక్కడలేని ఉత్సాహం వచ్చేస్తుంది. అంత ఫన్నీగా ఉంటాయి ఆ పేరుతో తయారైన యాడ్స్. ఐతే ఇప్పటిదాకా స్టార్ స్పోర్ట్స్ ఛానెల్ మాత్రమే ‘మౌకా మౌకా’ పేరుతో యాడ్స్ వదిలేది. ఇప్పుడు అభిమానులు కూడా తమదైన క్రియేటివిటీతో సొంతంగా మౌకా మౌకా యాడ్స్ తయారు చేసి యూట్యూబ్ లో పెడుతున్నారు. అందులో కొన్ని యాడ్స్ కు అద్భుతమైన స్పందన వస్తోంది. తాజాగా ఓ అభిమాని తయారు చేసిన మౌకా మౌకా యాడ్ ఇంటర్నెట్లో సెన్సేషన్ క్రియేట్ చేస్తోంది. ఇంతకీ ఆ యాడ్ సంగతులేంటో చూద్దాం పదండి.

పాకిస్థాన్ క్రికెట్ టీమ్ డ్రెస్ వేసుకున్న ఓ అభిమాని స్టూడియో ఫొటో దిగుతుంటాడు. చేతిలో ఏదో పట్టుకున్న కలర్ ఇస్తున్న అతడికి ఫొటోగ్రాఫర్ అడ్డస్ట్ మెంట్లు చెబుతుంటాడు. అలాగే చేతిలో ఉన్న వస్తువును ముద్దాడుతున్నట్లు కూడా అతను పోజులిస్తుంటాడు. అంతా అయిపోయాక.. రేపటికల్లా రెడీ అయిపోతుంది కదా అంటాడు. దీనికి ఇండియన్ క్రికెట్ టీమ్ డ్రెస్ వేసుకున్న ఫొటోగ్రాఫర్.. ‘‘అయిపోతుంది. ఫొటోషాప్ లో మీరు ప్రపంచకప్ గెలిచి చేతిలో పట్టుకున్నట్లు రెడీ చేసి ఇచ్చేస్తాం’’ అంటూ పాకిస్థాన్ అభిమానిని సాగనంపుతాడు.

ఆ తర్వాత బంగ్లాదేశ్ డ్రెస్ వేసుకున్న అభిమాని వస్తాడు. మేం ప్రపంచకప్ గెలవాలంటాడు. అందుకు బదులుగా..‘‘సరే సరే.. ఫొటో షాప్ లో చేసేద్దాం’’ అని బదులిస్తాడు ఫొటోగ్రాఫర్. ఐతే ఆ ఫ్యాన్ ‘‘ఫొటో షాప్ లో కాదు.. నిజంగానే ప్రపంచకప్ గెలవాలి’’ అంటాడు. ఫొటోగ్రాఫర్ అదోలా చూసి.. అతడి మెడ కొలతలు చూసుకుని కత్తి తీస్తాడు. ఆ అభిమాని ఆశ్చర్యపోయి ఏం చేస్తున్నావ్ అని అడిగితే.. ‘‘నీ తల తీసి.. మెడ మీద ధోని తలపెడతా’’ అని బదులిస్తాడు ఫొటోగ్రాఫర్. అంతే.. తర్వాత కలుస్తా అంటూ అక్కడి నుంచి పలాయనం చిత్తగిస్తాడు బంగ్లా ఫ్యాన్. ఇంటర్నెట్ లో ఈ వీడియోను ఇప్పటిదాకా ఎనిమిదిన్నర లక్షల మంది దాకా చూడటం విశేషం.