వైజాగ్ కు సర్వీసులు బంద్ చేసిన ఇండిగో, ఎయిర్ ఏషియా

ఏపీ రాజధానిగా సీఎం జగన్ విశాఖను చేయడానికి దాదాపు మార్గం సుగమం అవుతోంది. పరిపాలన రాజధానిగా విశాఖను చేసి అక్కడి నుంచే పాలన సాగించడానికి జగన్ రెడి అయ్యారు. ఏపీ ప్రభుత్వం ఓ వైపు విశాఖకు అత్యంత ప్రాధాన్యం ఇస్తూ సౌకర్యాలు కల్పిస్తుంటే తాజాగా ఈ తీరప్రాంత రాజధానికి పెద్ద ఎదురుదెబ్బ తగిలింది..

తాజాగా విశాఖకు విమాన సర్వీసులు నిలిపివేయాలని ఇండిగో , ఎయిర్ ఏషియా విమాన సర్వీసులు నిర్ణయించాయి. చెన్నై-వైజాగ్, హైదరాబాద్-వైజాగ్ మధ్య విమానాలను నడుపుతున్న ఇండిగో ఈ సేవలను మార్చి 2వ వారం నుంచి నిలిపివేయాలని నిర్ణయించింది.

ఇక ఎయిర్ ఏషియా సైతం కోల్ కతా-వైజాగ్ మధ్య విమానాలు నడిపిస్తోంది. ఈ సేవలను తాజాగా ఉపసంహరించుకుంది.

అయితే నిర్వహణ భారంతో ఈ రెండు సంస్థలు వైదొలగాయి. ఇదే సమయంలో పలు దేశీయ విమానయాన సంస్థలు వైజాగ్ నుంచి బెంగళూరు, వైజాగ్ నుంచి హైదరాబాద్ విమానాలు నడిపేందుకు కొత్తగా దరఖాస్తు చేసుకోవడం ఊరటనిచ్చింది.

ఎయిర్ ఏషియా విశాఖ-కోల్ కతా విమాన సర్వీసుల రద్దు చేయాలని కోరిన అభ్యర్థన కు ఎయిర్ పోర్టు ఆథార్టీ ఆఫ్ ఇండియా ఇంకా అనుమతి ఇవ్వలేదని తెలిసింది. ఇక స్పైస్ జెట్ కూడా విశాఖ-ఢిల్లీ విమాన సేవలను వారం రోజుల పాటు నిలిపివేసింది. ఏపీలోని అతిపెద్ద నగరం విశాఖ.. వ్యాపార, పారిశ్రామిక పరంగా దినదినాభివృద్ధి చెందుతోంది. ప్రతీ సంవత్సరం విమాన ప్రయాణికులు పెరుగుతున్నందున విమాన సంస్థలు వైదొలగడం విమానయానరంగానికి తీవ్ర దెబ్బగా పరిగణించింది.