సిరంజీ విని పట్టుకున్నారు

కొన్ని రోజులుగా తెలుగు రాష్ర్టాల పోలీసుల‌కు కంటిమీద కునుకు లేకుండా చేసిన ఇంజక్షన్ గ్యాంగ్ లో ఒకడిని పట్టుకున్నారు. హైద‌రాబాద్ ఫిల్మ్ న‌గ‌ర్ లో ఓ చిన్నారి సూది గుచ్చేందుకు ప్రయత్నించి ఈ సిరంజీవి దొరికిపోయాడు. ఆ సూదిగాడిని ప‌ట్టుకున్న స్థానికులు వాడికి చిత్తుగా కొట్టి పోలీసుల‌కు అప్పగించారు.

తొలుత పశ్చిమగోదావరి జిల్లాలో ప్రారంభమైన ఈ సూది దాడులు క్రమంగా చాలా జిల్లాలకు విస్తరించాయి. హైదరాబాద్ లోనూ పలుచోట్ల ఇంజక్షన్ దాడులు జరిగాయి. దాదాపు ప‌దిహేను రోజులుగా ఈ ఇంజక్షన్ గ్యాంగ్ పోలీసులకు దొరక్కుండా.... దాడులు ఆపకుండా ప్రజలను హడలెత్తించింది. 20 మందికి పైగా ఈ సిరంజి దాడులకు గురయ్యారు.

గ్యాంగ్ లో ఒకరు దొరకడంతో విచారించి మిగతావారినీ పట్టుకుంటామని పోలీసులు చెబుతున్నారు. ఏపీలో దాడులు చేస్తున్న ముఠా, తెలంగాణలో దాడులు చేస్తున్న ముఠా ఒకటేనా కాదా అన్నది తెలియాల్సి ఉంది.