ఐసిస్ తో టాప్ మోడల్ కు లింకులున్నాయట!

నరరూప రాక్షసుల గురించి పురాణాల్లోనూ.. కాల్పనిక కథల్లో చదివి ఉంటాం. కానీ.. అలాంటి వారు రియల్ గా ఉన్నారనిపించేలా తమ చేష్టలతో నిరూపించినోళ్లు ఐసిస్ ఉగ్రవాదులు. మనిషి రూపంలో ఉండే వీరిలో మానవత్వం అన్నది ఒక్క గ్రాము కూడా ఉండదన్న విషయం.. ఇప్పటికే పలుమార్లు నిరూపితమైంది. అలాంటి రాక్షసులతో బ్రిటీష్ టాప్ మోడల్ కు లింకులు ఉన్నట్లుగా వచ్చిన వార్తలు సంచలనం సృష్టిస్తున్నాయి.

బ్రిటీష్ టాప్ మోడల్ కింబర్లీ మైనర్స్ కు ఐసిస్ ఉగ్రవాదులతో లింకులు ఉన్నాయన్న ఆరోపణతో ఆమెను తాజాగా అరెస్ట్ చేయటం ఇప్పుడు హాట్ టాపిక్ గా మారింది. ఇటీవలే ఈమె ఇస్లాంలోకి మారినట్లుగా ఒక ప్రముఖ మీడియా సంస్థ వెల్లడించటం ఒక కోణమైతే.. ఐసిస్ కు సంబంధించిన ఫోటోలు.. వీడియోలను సోషల్ మీడియాలో పోస్ట్ చేయటం.. ఐసిస్ లో చేరాలంటూ ఆమె చేస్తున్న ప్రచారంపై భద్రతాధికారులకు సమాచారం అందటం.. ఈ అంశంపై ప్రాధమికంగా విచారణ జరిపిన వారు.. ఆమెను అదుపులోకి తీసుకున్నారు.

ఐసిస్ తో ఆమెకు సంబంధాలున్నాయన్న సందేహాలు వ్యక్తమైన వేళ.. ఆమెకు పలుమార్లు పోలీసులు కౌన్సె లింగ్ ఇచ్చి పంపినట్లుగా చెబుతున్నారు. అయినప్పటికీ ఆమె తన తీరును మార్చుకోలేదన్న వ్యాఖ్యలు వినిపిస్తున్నాయి. తన పాపులారిటీ మరింత పెంచుకోవటం కోసం అందరి దృష్టిని ఆకర్షించేలా ఫోటోలు పోస్ట్ చేయటమే కాదు.. ఐసిస్ లో చేరాలంటూ చేస్తున్న పోస్టుల్ని చూపిస్తున్నారు. ఇదిలా ఉంటే.. తనకే పాపం తెలీదని.. ఇదంతా తనను ఇరుకున పెట్టేందుకే నకిలీ అకౌంట్ తో ఇలాంటి ప్రచారాలు చేస్తున్నారని.. తనను విడిచి పెట్టాలంటూ ఆమె వాపోతున్నట్లు చెబుతున్నారు.

Like Us on Facebook : https://www.facebook.com/Tupakidotcom/