‘చెట్టు మీదే ఐసోలేషన్’ పేదరికం నుంచి పుట్టిన ఆలోచన..!

కరోనా వస్తే కచ్చితంగా ఐసోలేషన్​ లో ఉండాలి. లేదంటే ఆ మహమ్మారి మన కుటుంబసభ్యులకు కూడా సోకే ప్రమాదం ఉంది. మన కుటుంబంలో వృద్ధులు, చిన్నపిల్లలు ఉంటే మరింత జాగ్రత్తగా ఉండాలి. కానీ మనదేశంలో పేద, మధ్యతరగతి ప్రజలు ఎక్కువ సంఖ్యలో నివసిస్తుంటారు. ఐసోలేషన్​ లో ఉండటం వీళ్లకు సాధ్యమేనా? అంటే కచ్చితంగా కాదనే చెప్పాలి. ఎందుకంటే మనదేశంలోని చాలా కుటుంబాలు ఒకే గదిలో నివసిస్తూ ఉంటారు. కుటుంబంలో నలుగురు లేదా ఐదుగురు ఉంటారు. వారిలో ఎవరికైనా కరోనా వస్తే ఇక ఆ కుటుంబం నరకం అనుభవించాల్సిందే.

ఎందుకంటే ప్రస్తుతం కోవిడ్​ సెంటర్లు అన్ని బాధితులతో నిండిపోయాయి. ప్రభుత్వ ఆస్పత్రుల్లో జాగా లేదు. లక్షలు వెచ్చించి ప్రైవేటు ఆస్పత్రికి పేద ప్రజలు వెళ్లలేరు. దీంతో ఓ పేద యువకుడు వినూత్నంగా ఆలోచించాడు. తన ఇంటి వద్ద చెట్టుమీద ఐసోలేషన్​ గదిని ఏర్పాటు చేసుకున్నాడు. అతడికి కరోనా సోకడంతో తొమ్మిదిరోజులుగా ఆ చెట్టుమీదే ఉంటున్నాడు. ఇందుకు సంబంధించిన ఫొటో ప్రస్తుతం సోషల్​ మీడియాలో వైరల్​ గా మారింది. భారత్​ లోని పేదరికానికి ఈ చిత్రం అద్దం పడుతున్నదని కొందరు కామెంట్లు పెడుతున్నారు.

నల్లగొండ జిల్లా, అడవిదేవులపల్లి మండలం, కోతనందికొండ కు చెందిన రమావత్​ శివకు ఇటీవల కరోనా సోకింది. ఐసోలేషన్​ లో ఉండి చికిత్స తీసుకోవాలని డాక్టర్లు చెప్పారు. అతడి కుటుంబంలో మొత్తం ఐదుగురు ఉంటారు. వారందరికీ ఒకే గది ఉంది. దీంతో ఏం చేయాలో శివకు అర్థం కాలేదు. అందుకే తన ఇంటి ముందు ఉన్న చెట్టుమీద ఓ మంచం ఏర్పాటు చేసుకొని తొమ్మిది రోజులుగా అక్కడే ఉంటున్నాడు. కుటుంబసభ్యులు అతడికి కింద నుంచే ఆహారం అందిస్తున్నారు.దాదాపు తొమ్మిది రోజులుగా శివ చెట్టుమీద నివాసం ఉంటున్నాడు. ఈ ఫొటో సోషల్​ మీడియాలో నెటిజన్లను కదిలించింది.