జగన్ వీరాభిమాని.. అదిరే ఐడియాతో వినూత్నంగా ప్రచారం

తెలుగు రాష్ట్రాల్లో మరే అధినేతకు లేని కమిట్ మెంట్ ఉన్న వీరాభిమానులు ఏపీ సీఎం జగన్మోహన్ రెడ్డికి ఉన్నారని చెప్పాలి. పార్టీతో లింకు లేకుండా.. ఎవరి అండదండలు లేకున్నా.. కేవలం జగన్ మీద ఉన్న అభిమానంతో.. ఆరాధన భావంతో పార్టీ కోసం శ్రమించే హార్డ్ కోర్ అభిమానులకు కొదవ లేదు. ఆ కోవలోకే వస్తారు విజయనగరం జిల్లా బొబ్బొలికి చెందిన రియాజ్.

తన అభిమాన నేత జగన్ ను విపరీతంగా ఆరాధించే ఇతగాడు.. తాజాగా ఏపీలో జరుగుతున్న పరిషత్ ఎన్నికల్లో తనదైన శైలిలో ప్రచారం చేస్తున్నాడు. పార్టీకి ఎలాంటి సంబంధం లేకున్నా.. తనకున్నవ్యక్తిగత అభిమానంతో సొంతంగా చేస్తున్న ప్రచారం పలువురిని ఆకర్షిస్తోంది. వాహనానికి పార్టీ గుర్తు అయినా ఫ్యాన్ ను ప్రతిబింబించేలా రెక్కల్ని కట్టేసి.. ప్రచారాన్ని నిర్వహిస్తున్నారు.

తన ద్విచక్ర వాహనానికి చుట్టూ వివిధ రకాల ఫ్యాన్ రెక్కల్ని అమర్చిన ఇతగాడు.. వీధి వీధి తిరుగుతూ ఫ్యాన్ గుర్తుకు ఓట్లు వేయాలని కోరుతున్నాడు. ఇన్ని ఫ్యాన్ రెక్కలు ఒకే చోట దర్శనం ఇవ్వటంతో ఇతడి ప్రచారం అందరిని ఆకర్షిస్తోంది. బొబ్బిలి నియోజకవర్గంలోని పలు గ్రామాల్లో ఇతను చేస్తున్న ప్రచారానికి సంబంధించిన ఫోటోలు సోషల్ మీడియాలో వైరల్ గా మారాయి. ఎలాంటి స్వార్థం లేకుండా జగన్ మీద ఉన్నఅభిమానంతో రియాజ్ ప్రచారం చేస్తున్నాడన్న మాట పలువురి నోట వినిపిస్తోంది.