గ‌ర్వ‌ప‌డుతున్నాం!.. స‌ర్జిక‌ల్ స్ట్రైక్స్‌ పై జ‌గ‌న్ మాటిదే!

పుల్వామా ఉగ్ర‌దాడికి ప్ర‌తీకారంగా నేటి తెల్లవారుజామున భార‌త వైమానిక ద‌ళం జ‌రిపిన స‌ర్ఝిక‌ల్ స్ట్రైక్స్‌ పై ఇప్పుడు దేశ‌వ్యాప్తంగా హ‌ర్షాతిరేకాలు వ్య‌క్త‌మ‌వుతున్నాయి. 40 మంది భార‌త జ‌వానుల‌ను బ‌లిగొన్న జైషే మొహ్మ‌ద్ శిబిరాలే ల‌క్ష్యంగా కొన‌సాగిన ఈ దాడుల్లో ఏకంగా 300 మంది ఉగ్ర‌వాదులు మ‌ర‌ణించారు. కేవ‌లం 20 నిమిషాల వ్య‌వ‌ధిలో ముగిసిన ఈ దాడుల్లో భార‌త్ సత్తా ఏమిటో... ఉగ్ర‌వాదుల‌కు అండ‌గా నిలుస్తూ వ‌స్తున్న పాకిస్థాన్‌ కు ఇట్టే అర్థ‌మైంద‌న్న వాద‌న కూడా వినిపిస్తోంది. స‌ర్జిక‌ల్ స్ట్రైక్స్ నేప‌థ్యంలో భార‌త స‌రిహ‌ద్దు వెంట హైఅలర్ట్ అమ‌లవుతుండ‌గా... ప్ర‌ధాని న‌రేంద్ర మోదీ నేతృత్వంలో కొన‌సాగిన ఈ దాడుల‌పై దేశ‌వ్యాప్తంగా ప్ర‌శంస‌లు వెల్లువెత్తుతున్నాయి. అధికార - విప‌క్షాల‌న్న తేడా లేకుండా దాదాపుగా అన్ని పార్టీలు కూడా స‌ర్జిక‌ల్ స్ట్రైక్స్‌ పై హ‌ర్షం వ్య‌క్తం చేస్తూ.. మోదీ స‌ర్కారు డేరింగ్ డెసిష‌న్‌ ను - ఇండియ‌న్ ఎయిర్ ఫోర్స్ సామ‌ర్ధ్యాన్ని ఆకాశాన‌కెత్తుతూ ఆయా పార్టీల నేత‌ల నుంచి ప్ర‌శంస‌లు వెల్లుతెత్తుతున్నాయి.

ఈ క్ర‌మంలోనే నేటి ఉద‌యం లండ‌న్ ప‌ర్య‌ట‌న నుంచి తిరిగి వ‌చ్చిన వైసీపీ అధినేత వైఎస్ జ‌గ‌న్ మోహ‌న్ రెడ్డి కూడా ట్విట్ట‌ర్ వేదిక‌గా #స‌ర్జిక‌ల్ స్ట్రైక్స్‌2 పేరిట ఎంట్రీ ఇచ్చిన హ్యాష్ ట్యాగ్ ద్వారా స్పందించారు. ఉగ్రవాదులను తుదముట్టిస్తూ వీరోచితంగా దాడులు జరిపిన ఐఏఎఫ్‌ పైలట్లకు జ‌గ‌న్‌ అభినందనలు తెలిపారు. సర్జికల్‌ స్ట్రైక్స్‌-2ను విజయవంతంగా నిర్వహించిన భారత వైమానిక దళాన్ని చూసి గర్వపడుతున్నట్టు ఆయన త‌న ట్వీట్ లో పేర్కొన్నారు. జ‌గ‌న్ ట్వీట్ ఎలా సాగిందంటే... *ఉగ్రవాదులను తుదముట్టిస్తూ వీరోచితంగా దాడులు జరిపిన ఐఏఎఫ్‌ పైలట్లకు అభినందనలు. మిమ్మ‌ల్ని చూసి గర్వపడుతున్నాం* అని జ‌గ‌న్ త‌న ట్వీట్ లో పేర్కొన్నారు.