అమ్మ ప్రచారం చెవికెక్కింది...

తమిళనాడు ప్రజలకు ముద్దొచ్చినా, కోపమొచ్చినా రెండూ తీవ్రంగానే ఉంటాయి. తమిళనాడు రాజకీయాల్లో ఈ తీవ్రత స్పష్టంగా కనిపిస్తుంది. తమ నేతలపై ఉన్న అభిమానాన్ని చాటుకోవడంలో వారిని మించినవారే ఉండరు.. అధినాయకులకు సాష్టాంగ ప్రమాణాలు చేస్తారు. గుడులు కట్టిస్తారు.

అలాగే వారిని ఎవరైనా ఏమైనా అంటే తాట తీసేస్తారు. తాజాగా తమిళనాట ఎన్నికల్లో ఈ అభిమాన ఆగ్రహాలు పతాక స్థాయిలో ఉన్నాయి. ఇక అన్నా డీఎంకే అధినేత్రి, తమిళనాడు ముఖ్యమంత్రి జయలలిత అంటే ఆమె అభిమానులు పడిచస్తారన్నది తెలిసిందే. ఆమె కోసం ఏం చేయడానికైనా సిద్ధపడే అభిమానులు తమిళనాడులో అడుగడుగునా కనిపిస్తారు. అమ్మ పుట్టిన రోజు వస్తే తమిళనాడులో ఆమె బొమ్మ తప్ప ఇంకేమీ కనిపించదు.

తాజాగా ఎన్నికల సమయంలోనూ ఆమె అభిమానులు, పార్టీ కార్యకర్తలు ఎవరి స్థాయిలో వారు అభిమానం చూపిస్తున్నారు. ఇలాంటి అభిమానానికి సంబంధించిన ఓ చిత్రం ఇప్పుడు సోషల్ మీడియాలో తెగ షేర్ అవుతోంది. ఓ మహిళ ఏకంగా జయలలిత చిత్రంతో కూడిన పెద్ద చెవి దుద్దులను చేయించుకుని పెట్టుకున్న చిత్రం సోషల్ మీడియాలో హల్ చల్ చేస్తోంది. జయలలిత బొమ్మ కింద రెండాకుల గుర్తును కూడా చేర్చి దాంతో చెవి దుద్దులు చేయించుకుని పెట్టుకుందామె. ఇది చూస్తే అమ్మ ప్రచారం పూర్తిగా చెవికెక్కినట్లే ఉంది.