మాకు గతి లేదు రాజకీయంగా.. అందుకే చేరా ఆ పార్టీలో: రాయలసీమ ఫైర్ బ్రాండ్

టీడీపీ నేత, మాజీ ఎంపీ జేసీ దివాకర్ రెడ్డి ఏం మాట్లాడిన కుండబద్దలు కొట్టేస్తారు. అక్కడ చంద్రబాబు, మోడీ ఉన్నా ఆయన దేహ భాష మారదు. వారిముందే కడిగేస్తారు.. నెత్తిన పెట్టుకుంటాడు. ఈ రాయలసీమ రెడ్డప్ప తాజాగా టీడీపీపైనే హాట్ కామెంట్స్ చేశారు.

ఇటీవల తెలంగాణ కాంగ్రెస్ నాయకులను గాంధీ భవన్ లో కలిసిన జేసీ దివాకర్ రెడ్డి అక్కడ షాకింగ్ కామెంట్స్ చేశారు. ఏపీ చివరి సీఎం కిరణ్ కుమార్ రెడ్డి అసలు సీఎం అయ్యిండేవాడు కాదని పొరపాటు జరిగిందని చెప్పుకొచ్చారు. ఇప్పుడు తన సొంత పార్టీపై, పార్టీ అధినేతపై సంచలన వ్యాఖ్యలు చేశారు.

టీడీపీలో చేరడంపై జేసీ దివాకర్ రెడ్డి ఆసక్తికర వ్యాఖ్యలు చేశారు. అంతేకాదు సీఎం వైఎస్ జగన్.. మాజీ సీఎం చంద్రబాబుపైనే హీట్ పుట్టించే కామెంట్స్ చేశారు. జేసీ వ్యాఖ్యలు ఏపీ పాలిటిక్స్ లో చర్చనీయాంశమయ్యాయి.

సీఎం జగన్ కు తాను ప్రథమ శత్రువు కాదన్న జేసీ.. తాను చంద్రబాబును ద్వేషించే వ్యక్తిని అని అన్నారు. అయితే చంద్రబాబు-జగన్ ఎవరు బెటర్ అని ఆలోచించుకొని విధిలేని పరిస్థితుల్లోనే టీడీపీ తీర్థం పుచ్చుకున్నట్లు జేసీ వెల్లడించారు. అయితే చంద్రబాబు విజన్ ఉన్న నేత అని.. అందుకే ఆయనంటే తనకు అభిమానమంటూ తమ్ముళ్లకు కాస్త ఊరటనిచ్చే కామెంట్స్ చేశారు.

త్వరలో తిరుపతి లోక్ సభ స్థానానికి జరుగనున్న ఉప ఎన్నికపైనా జేసీ తనదైన శైలిలో మాట్లాడారు. తిరుపతిలో గెలుపు అధికార వైఎస్ఆర్ కాంగ్రెస్ పార్టీదేనని స్పష్టం చేశారు. టీడీపీ, బీజేపీలు గెలిచే పరిస్థితి లేదన్నారు.