లంచాలు తీసుకుంటానని అఫీషియల్ గా చెప్పాడే

లంచం అన్న మాట నేతల నోటి నుంచి చాలా భిన్నమైన రీతిలో వస్తుంటాయి. లంచాలు లాంటివి తమ దరికి కూడా చేరకుండా నీతిగా.. నిజాయితీగా పని చేస్తున్నట్లు చెప్పుకుంటుంటారు. ఏ నేత కూడా తాను లంచాలు తీసుకొని పని చేస్తానని చెప్పేందుకు సాహసించరు. కానీ.. అనంతపురం జిల్లాకు చెందిన జేసీ బ్రదర్స్ కాస్త భిన్నం.

సంచలన వ్యాఖ్యలకు కేరాఫ్ అడ్రస్ గా నిలిచే జేసీ బ్రదర్స్ లో ఒకరైన జేసీ ప్రభాకర్ రెడ్డి (జేసీ దివాకర్ రెడ్డి సోదరుడు) చేసిన వ్యాఖ్యలు కలకలం రేపుతున్నాయి. తాను ఇకపై లంచాలు తీసుకుంటానని.. ఆ వచ్చిన డబ్బుతో తాను అభివృద్ధి కార్యక్రమాలు చేపడతానని చెప్పి సంచలనం సృష్టించారు.

ప్రభుత్వం వద్ద డబ్బుల్లేవని.. తన నియోజకవర్గంలో రూ.30లక్షలు పెట్టి కల్యాణ మండపం నిర్మిస్తున్న విషయాన్ని గుర్తు చేసిన ఆయన.. అవినీతిపరుల నుంచి డబ్బు తీసుకొని దేని కోసం ఎంత ఖర్చు పెట్టింది చెబుతానని కుండ బద్ధలు కొట్టేశారు. ప్రభుత్వం దగ్గర ఎంత నిధుల కొరత ఉంటే మాత్రం.. ఎవరికి వారు అవినీతి దుకాణం తెరిచేసి ఇష్టారాజ్యంగా వసూలు చేసి అభివృద్ధి చేసే దానికి ప్రభుత్వం.. పరిపాలన లాంటివి అవసరమా?