సుమలత సంచలన ఆరోపణ..జేడీఎస్ అంతకు తెగిస్తుందా!

ఇది వరకే నటి సుమలతపై జేడీఎస్ వాళ్ల కామెంట్లు తీవ్ర వివాదాస్పదం అయ్యాయి. ఆమె ఎన్నికల్లో పోటీ చేయడాన్ని జేడీఎస్ జీర్ణించుకోలేకపోతోంది. ఈ అంశంపై వారు ఇష్టానుసారం మాట్లాడారు. అంబరీష్ మరణంతో ఆయన రాజకీయ వారసత్వాన్ని కొనసాగిస్తూ సుమలత పొలిటికల్ ఎంట్రీ ఇస్తూ ఉన్నారు. అంబీకి బాగా పట్టున్న మండ్య ప్రాంతంలో ఆమె రంగంలోకి దిగుతూ ఉన్నారు.

ఇలాంటి నేఫథ్యంలో ఆ సీటు మీద బాగా ఆశలు పెట్టుకున్న జేడీఎస్ సుమలత మీద విరుచుకుపడుతూ ఉంది. ఆమెపై తీవ్ర స్థాయి వ్యాఖ్యలు చేశారు జేడీఎస్ నేతలు. 'ఆమెకు అప్పుడే రాజకీయాలు అవసరమా..' అంటూ వారు తీవ్ర వ్యాఖ్యానాలు చేయడం వివాదాస్పదంగా మారింది.

జేడీఎస్ ముఖ్య నేత, కర్ణాటక సీఎం కుమారస్వామి తనయుడు మండ్య నుంచి ఎంపీగా పోటీలో ఉన్నాడు. అక్కడ జేడీఎస్ కు సుమలత ప్రధాన ప్రత్యర్థిగా మారింది. ఈ నేపథ్యంలో ఆమెపై వారి రాజకీయ పోరాటం సాగుతూ ఉంది. ఈ సందర్భంగా సుమలత ఒకింత సంచలన ఆరోపణలు చేశారు. జేడీఎస్ నేతలు తనను బెదిరిస్తూ ఉన్నారని.. తన మార్ఫింగ్ ఫొటోలను విడుదల చేసి పరువు తీయడానికి వారు ప్రయత్నిస్తూ ఉన్నారని సుమలత అన్నారు.

సుమలత ఎలాగూ ఒకప్పుడు ప్రముఖ నటి. కాబట్టి ఆమెకు సంబంధించిన ఫొటోలను మార్ఫింగ్ చేయడానికి జేడీఎస్ వాళ్లకు కూడా అవకాశం ఉండవచ్చు. తనను అలా బెదిరిస్తూ ఉన్నారని, జేడీఎస్ నేతలు మార్ఫింగ్ ఫొటోలతో రాజకీయం చేసేలా ఉన్నారని.. తనను రాజకీయంగా దెబ్బతీయడానికి అలాంటి కుటిల ప్రయత్నాలు వారు సాగిస్తూ ఉన్నారని సుమలత అంటున్నారు. ఇప్పటికే సుమలత విషయంలో తీవ్రంగా స్పందించి జేడీఎస్ విమర్శల పాలయ్యింది. ఇప్పుడు మార్ఫింగ్ ఫొటోల వరకూ తెగిస్తుందా? అనేది చర్చనీయాంశంగా మారుతోంది.