ఎయిర్ పోర్టు నుంచి ఫైవ్ స్టార్ హోటల్ కు వెళ్లిన నడ్డా

ప్రముఖులు ఏదైనా నగరానికి వెళ్లటానికి ముందే.. వారి షెడ్యూల్ పక్కాగా రెఢీ అయి ఉంటుంది. ఎప్పుడు ఎక్కడ ఉండాలో మినిట్ టు మినిట్ ముందే నిర్ణయించేస్తారు. అందునా బీజేపీ జాతీయ అధ్యక్షుడు అంటే.. చెప్పాల్సిన అవసరమే ఉండదు. అలాంటిది షెడ్యూల్ ను పక్కన పెట్టేసిన ఆసక్తికర అంశం తాజాగా నడ్డా హైదరాబాద్ నగర పర్యటనగా చోటు చేసుకోవటం గమనార్హం.

శుక్రవారం ఆయన హైదరాబాద్ లో గ్రేటర్ ఎన్నికల ప్రచారాన్ని నిర్వహించటంతో పాటు.. మేధావుల సదస్సులో పాల్గొన్నారు. షెడ్యూల్ ప్రకారం చూస్తే.. బేగంపేట ఎయిర్ పోర్టుకు చేరుకున్న తర్వాత.. నేరుగా నాగోల్ చౌరస్తాకు వెళ్లి ఎన్నికల ప్రచారంలో పాల్గొనాలి. అందుకు భిన్నంగా ఎయిర్ పోర్టు నుంచి నేరుగా బంజారాహిల్స్ లోని ఒక ప్రముఖ ఫైవ్ స్టార్ హోటల్ కు వెళ్లారు. షెడ్యూల్ లో లేని విధంగా నడ్డా హోటల్ కు వెళ్లటం ఆసక్తికరంగా మారింది.

స్వల్ప విశ్రాంతి పేరుతో షెడ్యూల్ ను మార్చారు. మరి.. వాస్తవంలో జరిగిందేమిటన్నది చూస్తే.. బేగం పేట ఎయిర్ పోర్టు నుంచి నేరుగా ఫైవ్ స్టార్ హోటల్ కు వెళ్లిన నడ్డా.. అక్కడ కేంద్ర సహాయ మంత్రి కిషన్ రెడ్డి.. తెలంగాణ రాష్ట్ర బీజేపీ అధ్యక్షుడు బండి సంజయ్ తో పాటు కీలక నేతలతో కలిసి సమీక్ష నిర్వహించారు.

ఈ సందర్భంగా గ్రేటర్ పార్టీ పరిస్థితి గురించిన చర్చతో పాటు.. ఎన్ని స్థానాల్లో గెలిచే అవకాశాలున్నాయన్న విషయంపై చర్చ జరిగినట్లుగా తెలుస్తోంది. గడిచిన మూడు రోజుల్లో చోటు చేసుకున్న రాజకీయ పరిణామాలు.. ఓటర్లలో నెలకొన్న మార్పును వివరించినట్లుగా సమాచారం. అంతేకాదు.. రోడ్ షో సందర్భంగా ఏయే అంశాల్ని ప్రస్తావించాలన్న అంశంపై నడ్డాకు కిషన్ రెడ్డి.. బండి సంజయ్ వివరించినట్లుగా తెలుస్తోంది.

ఈ కారణంగానే ఎయిర్ పోర్టు నుంచి నేరుగా రోడ్ షోకు వెళ్లకుండా.. ఫైవ్ స్టార్ హోటల్ కు వెళ్లినట్లుగా చెబుతున్నారు. ఈ హోటల్ కు వెళ్లటానికి మరోకారణం ఉంది. రోడ్ షో తర్వాత అక్కడే.. మేధావుల సదస్సు నిర్వహించారు. విశ్రాంతి పేరుతో హోటల్ కు వెళ్లి.. ముఖ్యనేతలతో రివ్యూ చేసిన సందర్భంగా నడ్డా షెడ్యూల్ గంటన్నర ఆలస్యం కావటం గమనార్హం.