జ‌డ్జీల విష‌యంలో బాబు త‌ప్పు..కేసీఆర్ బెస్ట్‌

న్యాయ‌మూర్తుల విష‌యంలో ఆంధ్రప్రదేశ్ ముఖ్యమంత్రి చంద్రబాబు మ‌రోమారు ఇర‌కాటంలో ప‌డ్డారు. సుప్రీంకోర్టు న్యాయమూర్తుల నియామకాల విష‌యంలో ఇప్ప‌టికే ప‌లు ఆరోప‌ణ‌లు ఆయ‌న‌పై రాగా...అది కొన‌సాగుతోంది. కేంద్ర న్యాయశాఖ మంత్రికి రాసిన లేఖలు ఆక్షేపణీయమని జాతీయ బీసీ కమిషన్ మాజీ చైర్మన్ - హైకోర్టు రిటైర్డ్ న్యాయమూర్తి జస్టిస్ వీ ఈశ్వరయ్య అన్నారు. జనచైతన్య వేదిక - తెలంగాణ బీసీ సంక్షేమ సంఘం సంయుక్త ఆధ్వర్యంలో సోమాజిగూడ ప్రెస్‌ క్లబ్‌ లో `రాజకీయాలలో సామాజిక న్యాయం` అంశంపై సమావేశం జరిగింది. ముఖ్యఅతిథిగా హాజరైన జస్టిస్ ఈశ్వరయ్య మాట్లాడుతూ న్యాయమూర్తుల నియామకాల్లో సామాజిక న్యాయం అవసరమని, ఈ విషయంలో చంద్రబాబు చర్యలు వాటికి విరుద్ధంగా ఉన్నాయని ఆరోపించారు. సుప్రీంకోర్టు జడ్జీల నియామకాల్లో ముఖ్యమంత్రుల అభిప్రాయసేకరణలో సీఎం కేసీఆర్ సదభిప్రాయాన్ని వ్యక్తపర్చ‌గా - ఏపీ సీఎం చంద్రబాబు అందుకు భిన్నంగా వెనుకబడినవారికి ప్రాధాన్యం ఇవ్వవద్దనే అభిప్రాయాన్ని లేఖ ద్వారా కేంద్రానికి తెలుపడం కలకలం రేపుతున్నదన్నారు.

ఉన్నత న్యాయస్థానాల్లో బీసీలు - ఎస్సీల ప్రవేశాన్ని నిరోధించడానికి చంద్రబాబు ప్రయత్నించారని ఈశ్వ‌ర‌య్య ఆరోపించారు. బీసీలకు క్షమాపణ చెప్పి చేసిన తప్పును చంద్రబాబు సరిదిద్దుకోవాలని ఆయన హితవుపలికారు. కొన్ని వర్గాలే రాజ్యాన్ని ఏలుతున్నాయని - వెనుకబడిన కులాలు పోరాడితేనే సామాజిక న్యాయం జరుగుతుందన్నారు. ఏపీ ప్రభుత్వ మాజీ ప్రధాన కార్యదర్శి ఐవైఆర్ కృష్ణారావు మాట్లాడుతూ అత్యంత వెనుకబడిన కులాలకు రాజకీయాల్లో సామాజిక న్యాయం కల్పించాలన్నారు. దేవాలయాల్లో రాజకీయాలు చేయకుండా వాటి ప్రాచీనతను - పవిత్రతను కాపాడాలని చంద్రబాబుకు రాసిన లేఖను ఆయన మీడియాకు విడుదల చేశారు.