పనామా పేపర్స్ ఫోర్త్ లిస్ట్ లో బాలీవుడ్ హాట్ కపుల్

పనామా పేపర్స్ లిస్ట్ మరొకటి విడుదలైంది. గడిచిన నాలుగు రోజులుగా సంచలనాల మీద సంచలనాలు సృష్టిస్తున్న ఈ ఉదంతం తాజాగా మరో జాబితాను విడుదల చేసింది. ఈ జాబితాలో బాలీవుడ్ కు చెందిన ఒక హాట్ కపుల్ పేర్లు ఉండటం సంచలనంగా మారింది.రెండు వారం కిందట కీ అండ్ కా పేరుతో విడుదలైన హిందీ చిత్రంలో హీరోయిన్ గా నటించిన కరీనా కపూర్.. ఆమె రియల్ లైఫ్ భర్త సైఫ్ ఆలీ ఖాన్ ఇద్దరి పేర్లు జాబితాలో ఉండటం గమనార్హం.

పనామా పేపర్స్ కుంభకోణానికి సంబందించి భారతీయ ప్రముఖుల పేర్లు విడుదల కావటం.. ఈ జాబితా విడుదలైన తొలి రోజునే బిగ్ బి అమితాబ్.. ఆయన కోడలు కమ్ బాలీవుడ్ సూపర్ హీరోయిన్లలో ఒకరైన ఐశ్వర్యారాయ్ ల పేర్లు ఉండటం హాట్ టాపిక్ గా మారింది. భారతీయులకు సంబంధించి మరికొందరి పేర్లు బయటకు వచ్చినా బిగ్ బీ ఫ్యామిలీ పేర్లు బయటకు రావటంతో.. వీరికి విపరీతమైన ప్రచారం లభిస్తోంది. తమపై వచ్చిన ఆరోపణల్ని మామా.. కోడళ్లు రియాక్ట్ కావటం.. తమకే పాపం లేదంటూ తేల్చి చెప్పే ప్రయత్నం చేశారు.

ఇదిలా ఉంటే.. తాజాగా బాలీవుడ్ జంట సైఫ్ అలీఖాన్.. కరీనా కపూర్ తో పాటు.. ఆమె సోదరి కరిష్మా కపూర్ పేర్లు కూడా బయటకు వచ్చాయి. వీటితో పాటు వీడియోకాన్ అధినేత వేణుగోపాల్ ధూత్ పేర్లు కూడా బయటకు వచ్చాయి. వీరితో పాటు.. ఫూనెలోని రియల్ ఎస్టేట్ రంగంలో అగ్రగామిగా పేరున్న చోరిడా ఫ్యామిలీ పేర్లు బయటకు వచ్చాయి. ఈ లెక్కన రానున్న రోజుల్లో మరెన్ని పేర్లు రానున్నాయో..?