హరీష్‌ ని పొమ్మనలేక పొగబెడుతున్నారా.?

తెలంగాణలో అసెంబ్లీ ఎన్నికలు అయిన తర్వాత అందరికి అస్సలు అర్థం కాని విషయం ఒక్కటే. కేసీఆర్‌ హరీష్‌ రావుని ఎందుకు దూరం పెడుతున్నారా అని. ఇప్పటికే రాజకీయ వర్గాల్లో ఈ చర్చ నడుస్తూనే ఉంది. రాబోయే రోజుల్లో కేసీఆర్‌ కేంద్రానికి వెళ్తారని.. అప్పుడు ఇక్కడ కేటీఆర్‌ ని ముఖ్యమంత్రిని చేస్తారని వార్తలు వచ్చాయి. కేసీఆర్‌ కేంద్రానికి వెళ్లినప్పుడు అక్కడ ఆయనకు తోడూనీడగా.. ఆ వ్యవహారాలన్ని హరీష్‌ రావే దగ్గరుండి చూసుకుంటారని సమాచారం వచ్చింది. అయితే ప్రస్తుతం అలాంటి పరిస్థితి కూడా కన్పించడం లేదు. పూర్తిగా హరీష్‌ ని పార్టీలో డమ్మీని చేసే ఏర్పాట్లు జరుగుతున్నాయని టాక్‌.

రెండు నెలల్లో లోక్‌ సభ ఎన్నికలు రాబోతున్నాయి. దీంతో.. ఈ బాధ్యతల్ని కేసీఆర్ హరీష్‌ కు అప్పగిస్తారని అనుకున్నారు అంతా. కానీ ఇప్పుడు కేసీఆర్ మొత్తం లోక్‌ సభ ఎన్నికల్ని దగ్గరుండి చూసుకోబోతున్నారు. ఆయన ఖమ్మం - మొదక్‌ - జహీరాబాద్‌ పార్లమెంట్‌ స్థానాలపై దృష్టి సారించారు. ఈ మూడు నియోజకవర్గాల్లో అభ్యర్థుల్ని ఫైనల్‌ చేయడం.. వారికి సహకరించే నాయకుల్ని ఏర్పాటు చేయడం దగ్గరనుంచి.. ఆ మూడు స్థానాల్ని దగ్గరుండి గెలిపించే బాధ్యత కేసీఆరే తీసుకున్నారు. ఇక మిగిలిన నియోజకవర్గాల్ని మంత్రులకు కేటాయించారు. వరంగల్‌ - మహబూబాబాద్‌ లకు ఎర్రబెల్లి దయాకర్‌ రావు - కరీంనగర్‌ కు ఈటల రాజేందర్‌ - సికింద్రాబాద్‌ కు తలసాని శ్రీనివాస్‌ యాదవ్‌ - మల్కాజిగిరి - చేవెళ్ల నియోజకవర్గాలకు మల్లారెడ్డి - భువనగిరి - నల్గొండ స్థానాలకు జగదీశ్‌ రెడ్డి - మహబూబ్‌ నగర్‌ స్థానానికి శ్రీనివాస్‌ గౌడ్‌ - నాగర్‌ కర్నూలుకు సింగిరెడ్డి నిరంజన్‌ రెడ్డి - ఆదిలాబాద్‌ కు ఇంద్రకరణ్‌ రెడ్డి - నిజామాబాద్‌ కు ప్రశాంత్‌ రెడ్డిని పెద్దపల్లికి కొప్పుల ఈశ్వర్లను ఇంచార్జులుగా నియమించారు ఈ మొత్తం వ్యవహారంలో ఎక్కడా హరీష్‌ రావు పేరు కానీ ప్రస్తావన కానీ రాకుండా జాగ్రత్తపడ్డారు. అంటే హరీష్‌ ప్రాధాన్యత క్రమాన్ని క్రమక్రమంగా కావాలనే కేసీఆర్ తగ్గిస్తున్నారని.. పాపం ట్రబుల్‌ షూటర్‌ కే ప్రస్తుతం ట్రబుల్స్‌ వచ్చాయని రాజకీయ విశ్లేషకులు అంచనా వేస్తున్నారు.