కేసీఆర్ ఢిల్లీ టూర్ పొడిగింపు.. రీజన్ అదేనా?

ఢిల్లీలో కొత్తగా నిర్మిస్తున్న తెలంగాణ భవన్ భూమిపూజ కోసం అక్కడికి వెళ్లిన తెలంగాణ ముఖ్యమంత్రి కేసీఆర్ పర్యటన మరో రెండు రోజులు పెరిగింది. దీన్ని బట్టి ఆయన మరో రెండు రోజులు ఢిల్లీలోనే మకాం వేయనున్నారు. నిన్న సెప్టెంబర్ 2 గురువారం రోజున ఢిల్లీలో టీఆర్ఎస్ ఆఫీస్ భవన నిర్మాణానికి భూమిపూజలో పాల్గొన్నారు సీఎం కేసీఆర్. సీఎంతో పాటు మంత్రులు, నేతలు , ఎంపీలు, ఎమ్మెల్యేలు ఈ ప్రోగ్రామ్ లో పార్టిసిపేట్ చేశారు. ఢిల్లీ టూర్ సందర్భంగా ప్రధాని సహా, పలు కీలక శాఖల కేంద్రమంత్రులను కలవాలని సీఎం నిర్ణయించారు. దీంతో షెడ్యూల్ మరో 2 రోజులు పొడిగించారు అధికారులు.

ఈ పర్యటనలో భాగంగా సీఎం కేసీఆర్.. ప్రధాని మోడీ, కేంద్ర జల్ శక్తి మంత్రి గజేంద్ర షెకావత్ లతో శుక్రవారం భేటీ అవుతారని తెలుస్తోంది. గోదావరి, కృష్ణా జలాల వ్యవహారం, కేంద్ర గెజిట్ తో పాటు రాష్ట్రానికి సంబంధించిన పలు అంశాలపై కేసీఆర్ చర్చించనున్నారు. రాష్ట్రానికి రావాల్సిన పెండింగ్ నిధులపైనా మోడీతో చర్చించనున్నారు. షెడ్యూల్ ప్రకారం సీఎం రేపు హైదరాబాద్ రావాల్సి ఉంది. ఐతే.. షెడ్యూల్ ను 2 రోజులు పొడిగించినట్టు అధికారులు సమాచారం ఇచ్చారు. రేపు కూడా ఢిల్లీలో ఉండనున్నారు సీఎం కేసీఆర్. కేంద్ర హోంమంత్రి అమిత్ షాతో ముఖ్యమంత్రి కేసీఆర్ భేటీ కానున్నారు. హోంశాఖ పరిధిలోని అంశాలపై చర్చిస్తారని తెలుస్తోంది.

ఆ ముగ్గురిని కలిసిన తర్వాత ఆదివారం ముఖ్యమంత్రి కేసీఆర్ దిల్లీ నుంచి హైదరాబాద్‌కు తిరుగుపయనమవుతారని పార్టీ వర్గాలు చెబుతున్నాయి. కృష్ణా, గోదావరి బోర్డుల పరిధిపై జారీ చేసిన గెజిట్‌, వివిధ ప్రాజెక్టులకు సంబంధించిన అంశాలపై జల్‌శక్తి మంత్రి గజేంద్రసింగ్‌ షెకావత్‌తో చర్చించేందుకు ముందస్తుగా పలువురు నిపుణులు, అధికారులతో ముఖ్యమంత్రి కేసీఆర్‌ గురువారం రాత్రి తన నివాసంలో సమావేశమయ్యారు. ఆయా అంశాలపై రాష్ట్ర ప్రభుత్వ వాదనలు మంత్రి వద్ద బలంగా వినిపించాలని సమావేశంలో చర్చించినట్లు సమాచారం