డియర్ గిన్నిస్ రికార్డ్సు..కేసీఆర్ గురించి తెలుసా?

తెలంగాణ ప్రాజెక్టులను పలు సమస్యల్లో ఇరికించేవారని కేసీఆర్‌ అన్నారు. తెలంగాణ ప్రాజెక్టులను అంతర్రాష్ట్ర, పర్యావరణ అనుమతుల సమస్యల్లో ఇరికించేవారని ఆయన చెప్పారు. నాగార్జున సాగర్‌ కాలువల నిర్వహణలోనూ వివక్ష ఉండేదని ఆయన అన్నారు. సాగర్‌ కుడి కాలువ లిఫ్టు నిర్వహించి - ఎడమ కాలువను వదిలేశారని - ఇది వివక్ష కాదా అని ఆయన ప్రశ్నించారు. తానెవరినీ విమర్శించడం లేదని, కేవలం నాటి సంఘటనలు ఉటంకిస్తున్నానని మాత్రమే చెప్పుకొచ్చారు. తెలంగాణ రాష్ట్రం ఏర్పడిన తరువాత అత్యంత ప్రధానమైన ఇరిగేషన్‌ పై దృష్టి సారించామని ఆయన అన్నారు. ఈ సందర్భంగా ఆయన పలు ఆసక్తికర అంశాలను ప్రస్తావించారు. ఉద్యమ సమయంలో తెలంగాణ మీదుగా ప్రవహిస్తున్న కృష్ణా - గోదావరి నదుల్లో తాను వేసినన్ని నాణేలు ఎవరూ వేసి ఉండరని ఆయన చెప్పారు. ఆ సంగతి తన డ్రైవర్ బాలయ్యకు తెలుసని... ఆయన తన కోసం జేబులో నాణేలు వేసుకుని వచ్చేవారని గుర్తు చేశారు. దాదాపుగా 35 ఏళ్లుగా బాలయ్యే తనకు డ్రైవర్ గా ఉన్నాడన్నారు.

కృష్ణా - గోదావరి నదులను దాటే తన పర్యటనలకు ముందు బాలయ్య రూపాయి నాణేలు కనీసం పది జేబులో వేసుకుని వచ్చి తనకు ఇచ్చేవాడని.. నదులను దాటేటప్పుడు అక్కడ ఆగడం నదీ ప్రవాహంలో నాణెం వేయడం తమ సంస్కృతి అని కేసీఆర్ చెప్పారు. ఈ క్రమంలో ఆ రెండు నదుల్లో తాను వేసినన్ని నాణేలను మరెవరూ వేసి ఉండకపోవచ్చని ఆయన పేర్కొన్నారు. ప్రతిసారి నదిలో నాణేలు వేసి తెలంగాణ బీడు భూములను తడపాలని నదీమ తల్లులను మనసారా వేడుకునేవాడినన్నారు. ప్రజలు - దేవుళ్లు - నదీమ తల్లుల చల్లని దీవెనలతో తెలంగాణ రాష్ట్రం ఏర్పడిందని.. ఇప్పుడు వారి దీవెనలతోనే సుభిక్షమవుతుందని ఆకాంక్షించారు. అనంతరం ఆయన స్లైడ్ లు వేస్తూ పవర్ పాయింట్ ప్రజెంటేషన్ ప్రారంభించారు.