లేడీ ఐపీఎస్ కొంపముంచిన సినీ మోజు

సినిమా నలుడితో ఫొటో దిగిన ఐపీఎస్ అధికారిణి ఇప్పుడు పాపం విమర్శలు ఎదుర్కొంటున్నారు. మలయాళ సినీ పరివ్రమంలో అందగాడిగా పేరున్న నివిన్ పాలీ స్విట్జర్లాండ్ నుంచి వచ్చి అక్కడి సినీరంగంలో స్థిరపడుతున్న నటుడు. గత ఆదివారం ఆయన ఎర్నాకుళంలో ఓ పాఠశాల కార్యక్రమంలో పాల్గొన్నారు. అదే కార్యక్రమం కేరళ హోం మంత్రి కూడా పాల్గొన్నారు. ఎర్నాకుళంలో అసిస్టెంట్ కమిషనర్ గా పని చేస్తున్న ఐపీఎస్ అధికారిణి మెరిన్ జోసెఫ్ అక్కడ భద్రతా ఏర్పాట్లు చూశారు. ప్రోగ్రాం అంతా ముగిశాక ఆమె నటుడు నివిన్ తో ఫోటో తీసుకున్నారు. మంచి అందగత్తె అయిన మెరిన్, నటుడు నివిన్ ల ఫొటో అదిరిపోయేలా వచ్చింది. ఆ ఫోటోను ఆమె తన ఫేస్ బుక్ పేజిలో పోస్ట్ చేశారు. దానికి లైక్ లు, కామెంట్లు అన్నీఇన్నీ కావు.

అంతవరకు బాగానే ఉన్నా అసలు కథ ఆ తరువాతే మొదలైంది. కేరళలోని పలు టీవీ చానళ్లకు ఆ ఫొటో దొరకడంతో అవి ఇక వార్తలు వండడం ప్రారంభించాయి. యూనిఫాంలో ఉన్న మహిళా ఐపీఎస్ ఇలా ఫోటో తీసుకుని సోషల్ మీడియాలో పెట్టడం ఏమిటని ప్రశ్నించాయి. హోం మినిస్టర్ పాల్గొన్న కార్యక్రమం అయినప్పటికీ డ్యూటీ మరిచిపోయి సినీ నటుడి వెంటపడ్డారంటూ కథనాలు ప్రసారం చేశాయి. పాపం.... దీంతో మెరిన్ చాలా ఫీలయింది... హోం మినిస్టర్ వెళ్లిపోయిన తరువాతే తాను నటుడు నివిన్ తో ఫొటో దిగానని వివరణ ఇచ్చుకుంది.

ఈ మధ్య సెల్ఫీలు బాగా పాపులర్ అవుతున్నాయి కదా... ఈ ఫొటో కూడా సెల్ఫీ అనుకోగలరు... అందాల ఆఫీసర్ , అందాల నటుడిని కలిపి ఫొటో తీసింది కేరళకు చెందిన ఓ కాంగ్రెస్ ఎమ్మెల్యే అట. ఆయన కూడా అదే కార్యక్రమానికి వచ్చారు. మొత్తానికి సినిమాలు, సినిమావాళ్లు అంటే ఉన్న ఆసక్తి పాపం ఆ లేడీ ఐపీఎస్ కు లేనిపోని తలనొప్పి తెచ్చిపెట్టింది.