బాలికలతో వెకిలి చేష్టలు..వీడియో వైరల్

బాలికలు - మహిళలకు ఈ సమాజంలో రక్షణ ఎండమావే అవుతోంది. రక్షణ కల్పించాల్సిన పోలీసు శాఖ ఈ విషయంలో దురుసుగా ప్రవర్తిస్తోంది. అమ్మాయిలు అంగడిబొమ్మగా మారిపోతున్నారు. తాజాగా కేరళ రాష్ట్రంలోని కొచ్చిలో ఓ పోలీసు వ్యవహరించిన తీరు విమర్శలపాలైంది.

కొచ్చిలోని తివారాలో చర్చి ముందు విధులు నిర్వర్తిస్తున్న హోంగార్డ్ శివకుమార్ అటుగా వెళుతున్న మహిళలు, బాలికలను అసభ్యంగా తాకుతూ వేధించాడు. అమ్మాయిలు ఆ హోంగార్డు తాకిడికి తీవ్రంగా ఇబ్బంది పడ్డారు. ఈ వ్యవహారాన్ని చూసిన ఓ వ్యక్తి వీడియోను తీసి సోషల్ మీడియాలో పెట్టడంతో అది కాస్త వైరల్ గా మారి వెలుగులోకి వచ్చింది.

కేరళలోని ఎలమక్కరాకు చెందిన శివకుమార్ (58) యూనిఫాంలో ఉండి ఇలా మహిళలను - స్కూలు విద్యార్థులను అసభ్యంగా తాకుతూ వారిని తీవ్ర ఇబ్బందులు పెట్టారు. తాత్కాలిక ఉద్యోగి అయిన అతడిని ఫైర్ డిపార్ట్ మెంట్ కు బదిలీ చేశారు. అయినా తీరు మార్చుకోకుండా మహిళలతో ఇలా అసభ్యంగా ప్రవర్తించాడు..

ఈ వీడియో వైరల్ కావడంతో నెటిజన్ల నుంచి పోలీస్ శాఖపై తీవ్ర విమర్శలు వచ్చాయి. దీనిపై సీరియస్ అయిన సిటీ పోలిస్ కమిషనర్ విధుల నుంచి తొలగించాలని ఆదేశాలు జారీ చేశారు. మరో వైపు శివకుమార్ పై ఐపీసీ 354 - పోక్సో చట్టంలోని 7 - 8 సెక్షన్ల కింద పోలీసులు కేసు నమోదు చేశారు.