పవన్ పై కొడాలి నాని సంచలన వ్యాఖ్యలు

పవన్ కల్యాణ్ నటించిన భీమ్లానాయక్ ఓవైపు మంచి టాక్ తెచ్చుకుంటోంది. కానీ ఇంకో వైపు మాత్రం రాజకీయ వేడిని రగుల్చుతోంది. భీమ్లానాయక్ సినిమా విడుదల సందర్భంగా జనసేన, వైసీపీ మద్దతు దారుల మధ్య మాటల వివాదం ముదురుతోంది. పవన్ సినిమా అయినందువల్లే టిక్కెట్ల రేట్లు తగ్గిస్తున్నారని జనసేన ముఖ్య నేతలు ఆరోపిస్తున్నారు.

అయితే వైసీపీ ఆ వ్యాఖ్యలపై వెంటనే స్పందిస్తోంది. అధికార పార్టికి చెందిన నేతలు తమదైన శైలిలో సమాధానం ఇస్తున్నారు. ఇప్పటికే పవన్ పై రోజా సంచలన వ్యాఖ్యలు చేయడం చర్చనీయాంశంగామారింది. తాజాగా వైసీపీ మంత్రి కొడాలి నాని పవన్ పై హాట్ కామెంట్స్ చేశాడు.

ఏపీలో టిక్కెట్ల వివాదం గత కొన్ని రోజులుగా సాగుతోంది. ప్రభుత్వం నిర్ణయించిన రేట్లకే సినిమా టిక్కెట్లు విక్రయించాలని రాష్ట్రంలో ఆదేశాలు జారీ చేసిన విషయం తెలిసిందే. అయితే ఇటీవల కొందరు సినీ ప్రముఖులు ఏపీ సీఎం జగన్ ను కలిసి తమ సమస్యలను విన్నవించారు.

వీరిలో మెగాస్టార్ చిరంజీవితో పాటు మహేశ్ బాబు, ప్రభాస్ హీరోలుండగా.. రాజమౌళి, కొరటాల శివ, ఇతర ప్రముఖులు ఉన్నారు. అయితే సినీ సమస్యలు చెప్పే క్రమంలో చిరంజీవి సీఎం జగన్ కు రిక్వెస్ట్ చేసిన వీడియో బయట పెట్టారు. ఇందులో జగన్ ను మెగాస్టార్ ప్రాథేయపడుతున్న వీడియో వైరల్ అయింది.

అయితే ఇటీవల నరసాపురంలో పవన్ నిర్వహించిన సభలో మన హక్కుల కోసం ప్రాథేయపడొద్దని, పోరాటం చేయాలని సంచలన వ్యాఖ్యలు చేశారు. అయితే పవన్ ఆ వ్యాఖ్యలను చిరంజీవిని ఉద్దేశించి అనకపోయినా కొందరు అందుకే అన్నారని ప్రచారం చేశారు. ఇక తాజాగా వైసీపీ మంత్రి కొడాలి నాని సైతం ఈ వ్యాఖ్యలను ప్రస్తావించారు.

మెగాస్టార్ చిరంజీవిని పవన్ అవమానించవచ్చా..? అని ప్రశ్నించారు.ఈ రాష్ట్రానికి జగన్ ముఖ్యమంత్రి అని, ఆయనకు గౌరవం ఇచ్చేలా చిరంజీవి మాట్లాడారని నాని అన్నారు.

ఇక భీమ్లానాయక్ సినిమా సందర్భంగా టిక్కెట్ల రేట్లు తగ్గించారని పవన్ తరుపున చేసిన విమర్శలపై కొడాలి నాని కౌంటర్ ఇచ్చారు. మాకు ఏ సినిమా అయినా ఒకటే.. ఇంతకుముందు రిలీజైన అఖండ, బంగార్రాజు సినిమాలకు ఎలాంటి రేట్లు నిర్ణయించామో.. ఇప్పుడు భీమ్లానాయక్ కూడా అంతే రేట్ ఫిక్స్ చేశామన్నారు.

రేట్లు తగ్గించారన్న ఆరోపణలు కరెక్ట్ కాదని నాని కౌంటర్ వేశారు. అంతేకాకుండా తాను సినిమా ఇండస్ట్రీకి చెందిన వ్యక్తినేనని, తల్లిలాంటి సినిమాను పవన్ తన రాజకీయాల కోసం వాడుకుంటున్నారని విమర్శించారు.

ఇప్పటికే భీమ్లానాయక్ విషయంలో సినీ నటి రోజా పంచ్ లు వేశారు. తాజాగా వైసీపీ మంత్రి కొడాలి నాని హాట్ కామెంట్స్ చేయడం చర్చనీయాంశంగా మారింది. అయితే మిగతా చోట్ల భీమ్లానాయక్ మంచి వసూళ్లు సాధిస్తుండగా ఏపీలో టిక్కెట్ల రేట్ల తగ్గింపు కారణంగా చాలా చోట్ల సినిమా రిలీజ్ కాలేదు.

కొన్ని చోట్ల థియేటర్లను మూసివేశారు. అయితే ఈ సినిమా రిలీజ్ రోజు పవన్ ఫ్యాన్స్ రాస్తారోకో చేశారు. ఈ విషయంపై పవన్ తన సినిమాపై ప్రభుత్వం కక్ష సాధింపు చర్యకు పాల్పడుతోందని విమర్శించారు.