అనకాపల్లి టీడీపీ ఎంపీ అభ్యర్థిగా కొణతాల రామకృష్ణ

అందరూ అనుకున్నదే జరిగింది. వచ్చే ఎన్నికల్లో కాంగ్రెస్‌ పార్టీ మాజీ నాయకుడు కొణతాల రామకృష్ణ టీడీపీ ఎంపీ అభ్యర్థిగా అనకాపల్లి నియోజకవర్గం నుంచి పోటీ చేసేందుకు రంగం సిద్ధమైంది. ఇవాళ విశాఖ జిల్లా నియోజకవర్గాల రివ్యూ మీటింగ్‌ లో పాల్గొన్న చంద్రబాబు ఈ విషయాన్ని చూచాయగా నాయకులకు అందించారు. కొణతాల లాంటి సీనియర్‌ నాయకుడు టీడీపీకి చాలా అవసరం అని ఈ సందర్బంగా చంద్రబాబు అన్నట్లు సమాచారం.

అనకాపల్లి మాజీ ఎంపీగా - వైఎస్ హయంలో మంత్రిగా పనిచేసిన కొణతాల రామకృష్ణ..వైఎస్‌ మరణం తర్వాత వైసీపీలో చేరారు. 2014 వరకు వైసీపీలో చాలా క్రియాశీలకంగా పనిచేశారు. కానీ ఏమైందో ఏమో.. వైసీపీలో ఆయన ఇమడలేకపోయారు. బయటకు వచ్చేశారు. ప్రస్తుతం కొణతాల రామకృష్ణ ఏ పార్టీలో లేరు. అయితే గత కొన్ని రోజులుగా ఉత్తరాంధ్ర చర్చా వేదిక అనే కార్యక్రమంతో ఉత్తరాంధ్ర అభివృద్ధి కోసం తన ప్రయత్నాలు మొదలుపెట్టారు. ఈ నేపథ్యంలో రెండు రోజుల క్రితం చంద్రబాబుని కూడా కలిశారు. ఆ సమయంలోనే చంద్రబాబు కొణతాల రామకృష్ణని పార్టీలోకి అహ్వానించారు. అయితే.. కార్యకర్తలతో మాట్డాడిన తర్వాత తన నిర్ణయాన్ని చెప్తానని అన్నారు ఆయన. ఈ ఉదయం తన నిర్ణయాన్ని చంద్రబాబుకి ఫోన్‌ చేసి చెప్పినట్లు సమాచారం. దీంతో.. అనకాపల్లి ఎంపీ సీటు నుంచి కొణతాల రామకృష్ణని పోటీ చేయించేందుకు చంద్రబాబు సిద్ధమయ్యారు. ఈ స్థానంలో సిట్టింగ్‌ ఎంపీగా ఉన్న అవంతీ శ్రీనివాస్‌ రీసెంట్‌గా వైసీపీలో చేరారు.