టీఆర్ ఎస్ ఎమ్మెల్యే తమ్ముడి వీరంగం

టీఆర్ఎస్ ప్రజాప్రతినిధుల ఆగడాలు శృతి మించిపోతున్నాయి. అధికార బలంతో ఏకంగా అధికారులపైనే దాడులు చేసేంత స్థాయికి దిగజారడం కలకలం రేపుతోంది. తాజాగా తెలంగాణలోని కొమురం భీం జిల్లాలో దారుణం జరిగింది.

కాగజ్ నగర్ టీఆర్ ఎస్ ఎమ్మెల్యే కోనేరు కోనప్ప సోదరుడు - జడ్పీ వైస్ చైర్మన్ అయిన కోనేరు కృష్ణ అధికారులపై రెచ్చిపోయారు. అనుచరులతో కలిసి అటవీశాక రేంజ్ ఆఫీసర్ - సిబ్బందిపై కర్రలతో దాడులకు దిగారు.

ఆదివారం ఉదయం కాగజ్ నగర్ లో కాళేశ్వరం ప్రాజెక్ట్ ప్రత్యామ్మాయ అటవీకరణ పనులను నిర్వహించడం మొదలు పెట్టారు. గిరిజనులు - ఇతరులు అడవులను కొట్టి సాగు చేసుకుంటున్న భూములను అటవీకరణ చేసేందుకు అటవీ అధికారులు పూనుకున్నారు.

అయితే జడ్పీ వైస్ చైర్మన్ కోనేరు కృష్ణ ఈ పని జరుగుతున్న ప్రాంతానికి వచ్చి జులం ప్రదర్శించారు. పనులను అడ్డుకొని అటవీ అధికారులతో వాగ్వాదం పెట్టుకున్నారు. అనంతరం రెచ్చిపోయి కోనేరు కృష్ణ, ఆయన అనుచరులు.. అటవీ రేంజ్ ఆఫీసర్ అనితతోపాటు సిబ్బందిపై కర్రలు - రాళ్లతో దాడులకు పాల్పడ్డారు. ఈ దాడిలో అధికారి అనితకు తీవ్రగాయాలయ్యాయి. ఆమె పరిస్థితి విషమంగా ఉంది. ఈ ఘటనపై అటవీ అధికారులు పోలీస్ ఉన్నతాధికారులకు ఫిర్యాదు చేశారు. ఎమ్మెల్యే తమ్ముడిను అరెస్ట్ చేయాలని కోరారు.