`గులాబీ`వార‌సుల చిన్న‌నాటి పిక్...వైర‌ల్!

అన్నా...నీ అనురాగం....ఎన్నో జ‌న్మ‌ల పుణ్య‌ఫ‌లం....నుంచి మొద‌లుకొని.....అన్నాచెల్లెలి సంబంధం....ఇది జ‌న్మ‌జ‌న్మ‌ల అనుబంధం....వ‌ర‌కు టాలీవుడ్ లో అన్నాచెల్లెళ్ల అనురాగానికి, ఆప్యాయ‌త‌కు అద్దంప‌ట్టే పాట‌లు కోకొల్ల‌లుగా ఉన్నాయి. తండ్రి త‌ర్వాతి స్థానాన్ని అన్నకు ఇవ్వ‌డం తెలుగు ఆడ‌ప‌డుచుల‌కు ఆన‌వాయితీ. రాహుల్ గాంధీ, ప్రియాంకా గాంధీ మొద‌లుకొని.....అన్న‌గారి కుటుంబంలో హరికృష్ణ - పురంధేశ్వ‌రి ల వ‌ర‌కు దేశ రాజ‌కీయాల్లో కూడా అన్నాచెల్లెళ్లు త‌మ అనుబంధాన్ని కొన‌సాగిస్తూనే ఉన్నారు. కొంద‌రు ఒకే పార్టీకి చెందిన వారైతే, మ‌రికొంద‌రు వేర్వేరు పార్టీల‌లో కొన‌సాగుతున్నారు. రాజ‌కీయాల‌ప‌రంగా వైరం ఉన్న‌ప్ప‌టికీ....ర‌క్త‌సంబంధాన్ని మాత్రం కొన‌సాగిస్తూనే ఉన్నారు. తెలంగాణ రాష్ట్ర స‌మితి అధ్య‌క్షుడు - తెలంగాణ సీఎం కేసీఆర్ కుమారుడు కేటీఆర్ - కూతురు క‌విత‌లు కూడా త‌మ తండ్రి చూపిన బాట‌లోనే ప‌య‌నిస్తున్నారు. ప్ర‌జ‌ల‌తో ఆ ఇద్ద‌రూ ప్ర‌జ‌ల‌తో మ‌మేక‌మై త‌మ‌కంటూ ప్ర‌త్యేక గుర్తింపు తెచ్చుకున్నారు. తాజాగా, ఈ `గులాబీ`వార‌సుల బాల్యానికి సంబంధించిన ఫొటో ఒక‌టి సోష‌ల్ మీడియాలో వైర‌ల్ అయింది.

సాధార‌ణంగా కొంద‌రు నేత‌లు త‌మ తండ్రి చాటు బిడ్డ‌లుగానే గుర్తింపును తెచ్చుకుంటారు. అయితే, కేటీఆర్, క‌విత‌లు మాత్రం త‌మ తండ్రి స‌ల‌హాలు, సూచ‌న‌లు పాటిస్తూనే.....త‌మ‌కంటూ ప్ర‌త్యేక‌మైన గుర్తింపును తెచ్చుకున్నారు. ఈ ఇద్ద‌రు డైన‌మిక్ లీడ‌ర్లు చిన్న‌తనంలో దిగిన ఫొటో ఒక‌టి బ‌య‌ట‌కు వ‌చ్చింది. ఓ ఫొటో స్టూడియోలో బొమ్మ స్కూట‌ర్ పై ఈ అన్నా చెల్లెళ్లు ఫొటోకు ఫోజులిచ్చారు. టీషర్ట్ - జీన్స్ ప్యాంట్ వేసుకొని హైస్కూల్ విద్యార్థిలా క‌నిపిస్తున్న కేటీఆర్ స్కూట‌ర్ వెనుక కూర్చొని న‌డుపుతున్న‌ట్లు ఫోజు పెట్టారు. ముందు హ్యాండిల్ ను ప‌ట్టుకొని క‌విత అమాయ‌కంగా చూస్తున్నారు. అయితే, క‌విత ధ‌రించిన డ్రెస్ తో పాటు....వారి వెనుక బ్యాక్ గ్రౌండ్ లో ఉన్న క‌ర్ట‌న్ కూడా గులాబీ రంగులో ఉండ‌డం విశేషం. బ‌హుశా....అప్ప‌టికే కేసీఆర్ కు త‌న `గులాబీ` పార్టీపై ఒక అవ‌గాహ‌న ఉందేమో! ఏది ఏమైనా ఈ ఇద్దరి చిన్న‌నాటి ఫొటో సోష‌ల్ మీడియాలో చ‌క్క‌ర్లు కొడుతోంది.