బావతో కేటీఆర్ సవాల్ చేసింది అందుకేనట

మీడియాతో సరదా ముచ్చట్లు పెట్టారు టీఆర్ ఎస్ వర్కింగ్ ప్రెసిడెంట్ కేటీఆర్. పండుగ వేళ సెలవు అయినప్పటికీ.. మీడియా మీట్ ఏర్పాటు చేసి ఇష్టాగోష్టిగా మాట్లాడారు. సాధారణంగా ఆదివారాలు.. పండుగ వేళల్లో మీడియా మీట్ పెట్టటం కేటీఆర్ వరకు తక్కువ. అందుకు భిన్నంగా ఈరోజు మీడియా సమావేశాన్ని నిర్వహించారు.

ఈ సందర్భంగా పలు ఆసక్తికర అంశాల్ని ప్రస్తావించారు. ఇటీవల జరిగిన లోక్ సభ ఎన్నికల్లో వందశాతం ఎంపీ సీట్లను గెలుస్తామన్న ధీమా వ్యక్తం చేశారు. 16 ఎంపీ స్థానాల్ని టీఆర్ ఎస్ కైవశం చేసుకుంటుందని పేర్కొన్నారు. మెజార్టీ సాధించే విషయంలో మెదక్ మొదటి స్థానంలో.. వరంగల్ రెండో స్థానంలో.. కరీం నగర్ మూడో స్థానంలో కానీ నాలుగో స్థానంలో కానీ నిలుస్తాయని చెప్పారు.

ఈ మధ్యన మెజార్టీ విషయంలో బావ హరీశ్ తో సరదాగా సవాల్ విసిరానని.. అదంతా ప్రజల్ని ఉత్తేజపర్చటానికే చేసినట్లు చెప్పుకున్నారు. మెదక్ ముఖ్యమంత్రి అడ్డా అని.. అక్కడ కచ్ఛితంగా టీఆర్ ఎస్ కు భారీ మెజార్టీ వస్తుందన్నారు. సరదాగా కానీ సీరియస్ గా కానీ ఏదో విధంగా బావ హరీశ్ ప్రస్తావన తీసుకొచ్చి.. కేటీఆర్ భలేగా కవర్ చేస్తుంటారని చెప్పాలి. బావతో అంతా బాగుందని.. ఆల్ ఈజ్ వెల్ అనిపించేలా చేయటంలో కేటీఆర్ టాలెంట్ ను మెచ్చుకోవాల్సిందే బాస్.