కేటీఆర్ తో చాయ్ కు నో చెప్పేశాడు!

ఎవ‌రు అవున‌న్నా.. కాద‌న్నా కేటీఆర్ ప‌వ‌ర్ ఎంత‌న్న విష‌యం తాజాగా షురూ అయిన అసెంబ్లీ స‌మావేశాల సంద‌ర్భంగా స్ప‌ష్టంగా కనిపిస్తోంది. ఆయ‌న ఎక్క‌డ ఉంటే.. అక్క‌డ‌కు టీఆర్ ఎస్ నేత‌ల సంద‌డి అంతా ఇంతా కాద‌న్న‌ట్లుగా ఉంది. బెల్లం చుట్టూ మూగిన ఈగ‌ల మాదిరి కేటీఆర్ చుట్టూ త‌ర‌చూ ఎమ్మెల్యేలు తిరుగుతూనే ఉన్న ప‌రిస్థితి క‌నిపిస్తోంది.

ఇంత‌టి హ‌డావుడిలో మాజీ మంత్రి క‌మ్ సీనియ‌ర్ కాంగ్రెస్ నేత శ్రీ‌ధ‌ర్ బాబు కనిపించ‌నంత‌నే.. ఆయ‌న్ను న‌వ్వుతూ ప‌లుక‌రించారు కేటీఆర్. దానికి రియాక్ట్ అయ్యారు శ్రీ‌ధ‌ర్ బాబు. అంత‌లో కేటీఆర్.. చాయ్ తాగుతూ మాట్లాడుకుందాం రండంటూ శ్రీ‌ధ‌ర్ బాబును ఆహ్వానించారు. ఇందుకు ఊహించ‌ని రీతిలో స్పందించారు శ్రీ‌ధ‌ర్ బాబు.

మీతో చాయ్ కా? వ‌ద్దు నాయ‌నో అంటూ న‌వ్వేశారు. తెలంగాణ అసెంబ్లీ లాబీల్లో చోటు చేసుకున్న ఈ ఉదంతం ప‌లువురి ముఖాన న‌వ్వులు విరిసేలా చేశాయి. అంత‌లోనే అక్క‌డ‌కు వ‌చ్చిన సీత‌క్క‌ను ప‌లుక‌రించారు కేటీఆర్. స్మార్ట్ గా ఉండే శ్రీ‌ధ‌ర్ బాబు.. మ‌రింత స్మార్ట్ గా క‌నిపించేందుకు బ్లాక్ కోట్ వేసుకొచ్చారు క‌ద‌క్కా? అంటూ మాట క‌లిపారు. దీంతో సీత‌క్క‌తో పాటు అక్క‌డున్న వారంతా న‌వ్వేశారు. మొత్తానికి కేటీఆర్ తో చాయ్ అంటే భ‌య‌ప‌డిపోయిన శ్రీ‌ధ‌ర్ బాబు ముందుచూపును మెచ్చుకోవాల్సిందే. తాజా సీన్ తో భ‌విష్య‌త్తులో కేటీఆర్ తో టీ తాగినా శ్రీ‌ధ‌ర్ బాబుకు పెద్ద‌గా ఇబ్బంది ఉండేద‌మో?