వారికి ల‌క్ష్మీపార్వ‌తి కౌంట‌ర్ ఇచ్చారుగా!

అంశ‌మేదైనా - విష‌యం ఎలాంటిదైనా.. ప్ర‌తిప‌క్ష నేత జ‌గ‌న్‌ ను అందులోకి తీసుకొచ్చి వీలైనంత‌గా బుర‌ద జ‌ల్లేందుకు టీడీపీ నేత‌లు ప్ర‌య‌త్నిస్తార‌నే విష‌యం మ‌రోసారి రుజువైంది! మ‌హాన‌టుడు - విశ్వవిఖ్యాత న‌ట‌ సార్వ‌భౌముడు నంద‌మూరి తార‌క‌రామారావు బ‌యోపిక్ తీస్తాన‌ని సంచ‌ల‌న ద‌ర్శ‌కుడు రామ్‌గోపాల్ వ‌ర్మ ప్ర‌క‌టించి అంద‌రినీ ఆశ్చ‌ర్య ప‌రిచారు. `లక్ష్మీస్ ఎన్టీఆర్‌` అంటూ టైటిల్ ఖ‌రారు చేయ‌డం - ల‌క్ష్మీపార్వ‌తి కోణంలో సినిమా ఉంటుంద‌ని చెప్ప డంతో టీడీపీ అధినేత‌ - సీఎం చంద్ర‌బాబులో టెన్ష‌న్ మొద‌లైంద‌నే చ‌ర్చ జ‌రుగుతోంది. ఈ సినిమా వెన‌కాల జ‌గ‌న్ ఉన్నాడ‌ని, ఆయ‌నే దీనికి డ‌బ్బులు పెడుతున్నాడ‌ని వ్యాఖ్యానిస్తున్నారు. ఇలాంటి వారికి ల‌క్ష్మీపార్వ‌తి స్ట్రాంగ్ కౌంట‌ర్ ఇచ్చారు!

ల‌క్ష్మీస్ ఎన్టీఆర్ సినిమా ఇప్పుడు టీడీపీ నేత‌ల్లో గుబులు పుట్టిస్తోంది! ఎన్టీఆర్ జీవితంలో అత్యంత కీల‌క‌మైన స‌మ‌యాన్ని తెర‌కెక్కిస్తాన‌ని వ‌ర్మ చెప్ప‌డం అంద‌రిలోనూ టెన్ష‌న్ పెంచుతోంది. ఎన్టీఆర్‌ ను ప‌ద‌వీచ్యుతిడిని చేసి.. అధికారాన్ని చేజిక్కించుకుని.. సొంత మామ‌నే వెన్నుపోటు పొడిచిన విష‌యం ఎన్టీఆర్‌ ను ఆరాధించే వారు ఎప్ప‌టికీ మ‌రిచిపోలేరు. మ‌రి `ల‌క్ష్మీస్ ఎన్టీఆర్‌`లో ఈ అంశాల‌ను ట‌చ్ చేస్తారో లేదో వేచి చూడాల్సిందే! త‌న సినిమాలో హీరోలు కానీ విల‌న్లు ఉండ‌రు అని వ‌ర్మ చెబుతున్నా.. టీడీపీ నేతలు భుజాలు తెగ‌ త‌డుముకుంటున్నారు. ఈ సినిమాతో ఏ సంబంధం లేని జ‌గ‌న్‌ ను తెర‌పైకి లాక్కొస్తున్నారు.

`లక్ష్మీస్ ఎన్టీఆర్` గురించి దివంగత ఎన్టీఆర్ సతీమణి లక్ష్మీపార్వతి ఆసక్తికర వ్యాఖ్యలు చేశారు. టీడీపీ నేత‌లు జ‌గ‌న్‌ పై చేస్తున్న వ్యాఖ్య‌ల‌కు స్ట్రాంగ్ స‌మాధాన‌మిచ్చారు. `జగన్ మనస్తత్వం తెలిసిన వారెవరూ కూడా ఈ సినిమా జగన్ తీయిస్తున్నాడని అనరు. తెలుగుదేశం పార్టీ కూడా అనలేదు. ఎందుకంటే, ఆ అబ్బాయి ఎలక్షన్స్ కే ఖర్చు పెట్టడని మా పార్టీలో మేమే బాధపడుతుంటాం. అలాంటిది, ఓ లక్ష్మీపార్వతి కోసం, ఎన్టీఆర్ కోసం జగన్ మోహన్ రెడ్డి సినిమా తీస్తాడనేది పచ్చి అబద్ధం` అని అన్నారు.