హాట్ న్యూస్ గా లాలూ చిన్న కొడుకు పెళ్లి.. పెళ్లికుమార్తె ఎవరంటే?

తేజస్వీ యాదవ్. తరచూ వార్తల్లో ఉండే ఇతడు.. బిహార్ లో హాట్ టాపిక్ గా నిలుస్తుంటారు. ఫ్యూచర్ లో బిహార్ రాష్ట్రానికి ముఖ్యమంత్రిగా అయ్యే అవకాశాలు పుష్కలంగా ఉన్నాయని చెప్పే అతడు.. ప్రస్తుతం తన తండ్రి స్థాపించిన ఆర్జేడీకి చీఫ్ గా వ్యవహరిస్తుండటమే కాదు.. బిహార్ విపక్ష నేతగా వ్యవహరిస్తున్నారు. అలాంటి తేజస్వీ తాజాగా తన పెళ్లిని అత్యంత నిరాడంబరంగా చేసుకున్న వైనం వార్తాంశంగా మారింది.

మాజీ ముఖ్యమంత్రి కమ్ కేంద్రమంత్రి లాలూప్రసాద్ యాదవ్ కు ఎనిమిది మంది ఆడపిల్లలు.. ఇద్దరు మగ పిల్లలు అన్న సంగతి తెలిసిందే. ఇప్పటివరకు లాలూ ఇంట్లో జరిగిన పెళ్లిళ్లల్లో అత్యంత నిరాడంబరంగా.. పరిమితంగా.. అత్యంత గోప్యంగా జరిగిన పెళ్లి ఇదేనని చెబుతారు. చాలా.. చాలా తక్కువ మందిని మాత్రమే పెళ్లికి పిలిచారు. దీన్నెంత రహస్యంగా ఉంచారంటే.. సోషల్ మీడియాలో పెళ్లి జరుగుతున్న సంగతి తెలుసుకున్న ఆర్జేడీ కార్యకర్తలు.. పార్టీ ప్రధాన కార్యాలయంలో సంబరాలు చేసుకున్నారు.

ఇంతకీ తేజస్వీయాదవ్ పెళ్లాడిన అమ్మాయి ఎవరు? అన్న విషయాన్ని చూస్తే.. తన చిన్ననాటి స్నేహితురాలు కమ్ క్లాస్ మేట్ అయిన రాచల్ ఐరిస్. ఆమె హర్యానాకు చెందిన ఒక వ్యాపారవేత్త కుమార్తె. చాలా ఏళ్లుగా తెలిసిన రేచల్ (రాజేశ్వరి యాదవ్)ను తేజస్వీ యాదవ్ ఢిల్లీ శివారులోని ఒక ఫామ్ హౌస్ లో పెళ్లి చేసుకున్నారు. ఈ వేడుకకు నిర్వహించారు. యూపీ మాజీ ముఖ్యమంత్రి అఖిలేశ్ యాదవ్ తో సహా.. లాలూ కుటుంబానికి అత్యంత సన్నిహితంగా ఉండే పరిమిత సభ్యుల మధ్య వీరిద్దరి పెళ్లి జరిగింది.

హిందూ సంప్రదాయం ప్రకారం జరిగిన ఈ పెళ్లి ఇప్పుడు ఆసక్తికరంగా మారింది. ఆసక్తికరమైన విషయం ఏమంటే.. తేజస్వీ ఎంగేజ్ మెంట్ జరుగుతుందని వార్తలు వస్తే.. అందుకు భిన్నంగా పెళ్లి వేడుక జరగటం పలువురిని ఆశ్చర్యానికి గురి చేసింది. పెళ్లి వేడుకకు హాజరయ్యే వారిని పూర్తి తనిఖీలు చేశాకే.. అనుమతుల్ని పక్కాగా పరిశీలించి మాత్రమే లోపలకు అనుమతించటం గమనార్హం. తన సోదరుడి పెళ్లి వేడుక ఫోటోల్ని ఆయన సోదరి సోషల్ మీడియా ద్వారా పంచుకొని కొత్త జంటకు శుభాకాంక్షలు తెలియజేశారు.