పుట్టినరోజున తాత మనసును దోచేసిన హిమాన్షు

అదేం దరిద్రమో కానీ.. ఇటీవల ప్రధాన మీడియాలో జరుగుతున్న తప్పులు.. పొరపాట్లు చూసినప్పుడు ఆశ్చర్యానికి గురయ్యేలా చేస్తున్నాయి. ఊరు.. వాడ అన్న తేడా లేకుండా జరిగిన కేసీఆర్ పుట్టినరోజు ప్రధాన మీడియా సంస్థలన్ని భారీ ప్రాధాన్యతను ఇచ్చాయి. అయితే.. ఈ హడావుడిలో కొన్నింటిని మిస్ చేసిన వైనం చూస్తే.. ఆశ్చర్యానికి గురయ్యేలా చేస్తోంది. తాజాగా వాట్సాప్.. సోషల్ మీడియాలో అందరిని ఆకర్షిస్తున్న ఒక ఫోటో ప్రధాన మీడియాలో మాత్రం కనిపించలేదు.

కేసీఆర్ 68వ పుట్టినరోజు సందర్భాన్ని పురస్కరించుకొని తాతకు బర్త్ డే విషెస్ చెప్పిన ముద్దుల మనమడు హిమాన్షకు సంబంధించిన ఫోటో ఎక్కడా కనిపించలేదు.

తనను ప్రాణంగా చూసుకునే తాతకు వినయంతో.. విధేయతతో.. అభిమాన పూర్వకంగా హిమాన్షు తాత కాళ్లకు నమస్కారం చేయటం.. పక్కనే హిమాన్షు సోదరి ఉండటం.. వెనుకనే తండ్రి కేటీఆర్ నడుము మీద చేతులు వేసుకొని మరీ.. కొడుకు తీరును శ్రద్ధగా చూస్తున్న వైనం చూస్తే.. ఒక పెద్ద పొలిటికల్ ఫ్యామిలీకి సంబంధించిన ఆసక్తికర ఫోటో మీడియాలో ఎందుకు వాడలేదన్న భావన కలుగక మానదు.

కేసీఆర్ పుట్టినరోజును పురస్కరించుకొని హిమాన్షు పెట్టిన పోస్టు ఆకర్షిస్తోంది. ‘తాతయ్య.. మీ ఓర్పు.. సహనం.. కరుణ.. కమిట్ మెంట్.. యాటిట్యూడ్.. తెలంగాణ ప్రజలకు చేసే సేవ భావం నాకెంతో స్ఫూర్తినిస్తోంది. నాకు మీకంటే మెరుగైన తాతయ్య మరెవరూ ఉండరని భావోద్వేగానికి గురయ్యారు. సోషల్ మీడియాలో తన ముద్దుల తాతను ఉద్దేశించి మనమడు హిమాన్షు పెట్టిన పోస్టు అందరిని ఆకర్షిస్తోంది.

ప్రధాన మీడియాకు పెద్దగా ప్రాధాన్యమనిపించని హిమాన్షు బర్త్ డే విషెస్ సోషల్ మీడియాలో మాత్రం అందరిని ఆకర్షించేలా ఉందని చెప్పాలి. ఏమైనా.. పుట్టినరోజు వేళ తాతకు బర్త్ డే విషెస్ తెలిపిన వైనం మాత్రం ఆకట్టుకునేలా మారింది.