బుగ్గన చెప్పింది నిజమేనని ఒప్పేసుకున్న లోకేశ్

హెరిటేజ్ తో తమకు సంబంధం లేదని.. తమ సంస్థ అని నిరూపిస్తే తన ఎమ్మెల్యే పదవికి రాజీనామా చేస్తానంటూ విరుచుకుపడిన ఏపీ విపక్ష నేత చంద్రబాబు.. అధికార వైఎస్సార్ కాంగ్రెస్ పార్టీ నేత కమ్ రాష్ట్ర ఆర్థికమంత్రి బుగ్గన సంధించిన ప్రశ్నకు మాత్రం సమాధానం చెప్పకపోవటం తెలిసిందే. హెరిటేజ్ ను అమ్మేశారంటున్నారు.. మరి బిగ్ బజార్ గ్రూపులో మీకు షేర్లు ఉన్నాయా? లేదా? అని అడిగినప్పుడు మాత్రం బాబు నోటి నుంచి సమాధానం రాని పరిస్థితి.

ఇదిలా ఉంటే.. బుగ్గన వేసిన ప్రశ్నకు చంద్రబాబు జవాబు ఇవ్వలేదు కానీ ఆయన కుమారుడు కమ్ ఎమ్మెల్సీ లోకేశ్ మాత్రం సమాధానం ఇచ్చారు. తన తండ్రి మాదిరే హెరిటేజ్ ను బిగ్ బజార్ గ్రూపునకు అమ్మేశామని.. హెరిటేజ్ ఫ్రెష్ కు తమకు సంబంధం లేదన్నారు. కాకుంటే.. బిగ్ బజార్ గ్రూపులో షేర్లు ఉన్నాయన్న లోకేశ్.. జగన్.. బుగ్గన లాంటివారికి కూడా పలు కంపెనీల షేర్లు ఉంటాయంటూ సిత్రమైన వాదనను వినిపించారు.

తమకు చెందిన సంస్థను ఒకరికి అమ్మేసి.. తమకు ఆ సంస్థకు సంబంధం లేదనటం ఓకే. కానీ.. ఆమ్మేసిన సంస్థకు చెందిన షేర్లు పెద్ద ఎత్తున ఉంచుకోవటం దేనికి నిదర్శనం లోకేశా? అన్న ప్రశ్నకు చినబాబు అందరికి అర్థమయ్యేలా సమాధానం ఇస్తే బాగుంటుందంటున్నారు. హెరిటేజ్ ఫ్రెష్ అమ్మేసి ఉండొచ్చు. కానీ.. ఆమ్మేసిన కంపెనీకి చెందిన షేర్లు పెద్ద ఎత్తున ఉండటం దేనికి నిదర్శనం? అన్నది అసలు ప్రశ్న. మరి.. దీనికి చినబాబు ఏమని బదులిస్తారో?