కాంగ్రెస్ ఓపెన్ ఆఫ‌ర్ః ప‌వ‌న్‌ కు మేం మ‌ద్దతిస్తాం

జనసేన అధినేత - ప‌వ‌ర్‌ స్టార్‌ పవన్ కల్యాణ్‌ కు ఊహించ‌ని మ‌ద్ద‌తు ద‌క్కింది. గ‌త ఎన్నిక‌ల్లో ఆయ‌న ఎవ‌రికి వ్య‌తిరేకంగా అయితే పోరాటం చేశారో వారి నుంచే ఆయ‌నకు ఫుల్ స‌పోర్ట్ దొరికింది. సినిమాలకు ఫుల్ స్టాప్ పెట్టి పూర్తిస్థాయి రాజకీయాల్లోకి రావలనుకుంటున్నట్లు తాజాగా జరిగిన మీడియా స‌మావేశంలో ఆయ‌న ప్ర‌క‌టించిన సంగతి తెలిసిందే. అయితే ఈ ఎపిసోడ్‌ లో ప‌వ‌న్‌ కు ఊహించని విధంగా కాంగ్రెస్ మద్దతు లభించింది.

ప్రస్తుతం రాష్ట్రంలో నెలకొని ఉన్న ప్రజా సమస్యలపై పోరాటానికి సిద్ధపడితే జనసేన అధ్యక్షుడు పవన్ కళ్యాణ్‌ కు కాంగ్రెస్ మద్దతు ఇస్తుందని పీసీసీ ఉపాధ్యక్షుడు మాదాసు గంగాధరం తెలిపారు. హైద‌రాబాద్‌ లోని ఇందిర భవన్‌ లో ఏర్పాటు చేసిన విలేకరుల సమావేశంలో మాట్లాడిన గంగాధరం.. పవన్ కళ్యాణ్ క్రియాశీల రాజకీయాల్లోకి రావడాన్ని కాంగ్రెస్ స్వాగతిస్తున్నదని ప్ర‌క‌టించారు. ప‌వన్ మొదట రాష్ట్రమంతా పర్యటించి పరిస్థితులపై అవగాహన కల్పించుకోవాలని చెప్పారు. రాష్ట్ర ప్ర‌జ‌ల స‌మ‌స్య‌ల‌పై పోరాటం చేస్తే తాము మ‌ద్ద‌తిచ్చేందుకు రెడీగా ఉన్నామ‌ని ప్ర‌క‌టించారు