బాయ్ కాట్ పై ఫైర్ అయిన బాలీవుడ్ హీరోపై ఆ రాష్ట్ర మంత్రి పంచ్ లు

ఇప్పటికే వరుస ఫ్లాపుల్ని ఎదుర్కొంటున్న బాలీవుడ్ కు ఒకదాని తర్వాత మరొకటి అన్న చందంగా కష్టాలు వచ్చి పడుతున్న సంగతి తెలిసిందే. బాలీవుడ్ కు సంబంధించిన కొన్నిసినిమాల విషయంలో షురూ అయ్యే బాయ్ కాట్ సోషల్ మీడియాలో ఎంతగా వైరల్ అవుతుందన్న విషయం తెలిసిందే.

అగ్ర హీరోల సినిమాల్ని సైతం ప్రభావితం చేస్తున్న 'బాయ్ కాట్' అంశంపై తాజాగా మాట్లాడిన బాలీవుడ్ హీరో అర్జున్ కపూర్ ఘాటు విమర్శలు చేశారు.

తాము ఇంతకాలం చూసి చూడనట్లుగా వ్యవహరించటం వల్లే ఇలాంటి పరిస్థితి అంటూ మండిపడిన ఆయన.. బాయ్ కాట్ ట్రెండ్ మీద బాలీవుడ్ మొత్తం ఏకతాటి మీదకు రావాలని.. ఈ సమస్యకు అసలు కారణం ఎక్కడ ఉందన్న విషయాన్ని గుర్తించాల్సిన అవసరం ఉందన్నారు.

తమ మంచితనాన్ని బలహీనతగా భావిస్తున్నారని.. ఇన్నాళ్లు ఈ అంశంపై మౌనంగా ఉండి తప్పు చేసినట్లుగా పేర్కొన్నారు. అతి సహనంతో ప్రజలు దాన్నివాడుకుంటున్నారన్న అతడి మాటలపై మిశ్రమ స్పందన రావటం తెలిసిందే.

అర్జున్ కపూర్ వ్యాఖ్యలపై కొందరు మండిపడితే.. కొందరు అతన్ని సమర్థించారు.అయితే.. మండిపడే వారితో పోలిస్తే.. మద్దతు ఇచ్చిన వారి సంఖ్య తక్కువనే చెప్పాలి. తాజాగా అర్జున్ కపూర్ వ్యాఖ్యలపై మధ్యప్రదేశ్ రాష్ట్ర మంత్రి నరోత్తమ్ మిశ్రా స్పందించారు. అతడి వ్యాఖ్యలకు తనదైన శైలిలో కౌంటర్ ఇచ్చారు.

అతనో ప్లాప్ నటుడని.. జనాల్ని బెదిరించే కంటే తన నటన మీద ఫోకస్ పెడితే అర్జున్ కపూర్ కు మంచిదని పేర్కొన్నారు. తమ సినిమాల్లో హిందుత్వాన్ని టార్గెట్ చేస్తూ టుక్డే టుక్డే గ్యాంగ్ కు మద్దతు పలికే వారు ప్రజల్ని బెదిరించే తీరును మానుకోవాల్సి ఉందని ఆగ్రహం వ్యక్తం చేశారు. అర్జున్ కపూర్ వ్యాఖ్యలపై మధ్యప్రదేశ్ రాష్ట్ర మంత్రి కమ్ బీజేపీ నేత చేసిన వ్యాఖ్యలు ఇప్పుడు మరింత సంచలనంగా మారాయి. మరి.. ఈ కౌంటర్ కు బాలీవుడ్ నటులు ఏ రీతిలో రియాక్టు అవుతారో చూడాలి.