కుటుంబంతో సహా ఎమ్మెల్యే పాదయాత్ర

ఆంధ్రప్రదేశ్ లో ఓ ఎమ్మెల్యే కుటుంబంతో సహా పాదయాత్ర చేస్తున్నారు. తన నియోజకవర్గంలో సమస్యలు పరిష్కారం కావడంతో ఆయన చేపట్టిన ఈ పాదయాత్రకు అపూర్వ స్పందన వస్తోంది. వేలాది మంది ఆయన వెంట నడుస్తున్నారు. ఇదేంటి... ఏపీలో ఒక ఎమ్మెల్యే పాదయాత్ర చేస్తుంటే పేపర్లు - టీవీల్లో కనిపించకపోవడం ఏంటనుకుంటున్నారు. పాదయాత్ర చేస్తున్నది ఏపీ ప్రాంతంలోనే అయినా చేస్తున్నది మాత్రం ఏపీ ఎమ్మెల్యే కాదు.. అలా అని తెలంగాణ ఎమ్మెల్యే కూడా కాదు. పాండిచ్చేరి రాష్ట్ర ఎమ్మెల్యే... అవును పాండిచ్చేరిలో భాగమైన ఏపీలో ఉన్న యానాం ఎమ్మెల్యే మల్లాడి కృష్ణారావు ఈ పాదయాత్ర చేస్తున్నారు. మామూలుగా అయితే ఎమ్మెల్యే స్థాయి వ్యక్తి పాదయాత్ర చేస్తే తెలుగు రాష్ట్రాల్లో మీడియాలో హోరెత్తిపోతుంది. కానీ చేస్తుంది యానాం ఎమ్మెల్యే కావడం... యానం ఏపీ మధ్యలో ఉన్నా టెక్నికల్ గా ఏపీలో లేకపోవడంతో ఆయన పాదయాత్రకు పెద్దగా ప్రాచుర్యం రాలేదు. కానీ, నియోజకవర్గ సమస్యల పరిష్కారానికి కృషి చేసి అవి నెరవేరడంతో ఇలా రెండుమూడు వేలమందితో కలిసి పాదయాత్ర చేయడం మాత్రం గొప్ప విషయమే.

తన నియోజకవర్గంలో సమస్యలు పరిష్కారమైనందుకు కృతజ్ఞతగా యానాం ఎంఎల్‌ ఎ మల్లాడి కృష్ణారావు తన కుటుంబం, సుమారు రెండు వేల మంది అబిమానులు, కార్యకర్తలతో శనివారం అంతర్వేదికి పాదయాత్ర చేపట్టారు. పాదయాత్రలో యానాం ప్రజలే కాకుండా ఆంధ్రప్రదేశ్ రాష్ట్రానిఇ చెందిన ఎదుర్లంక - మురమళ్ల - ముమ్మిడివరం - మహిపాల చెరువు - అనాతవరం - అమలాపురం నుండి పెద్ద సంఖ్యలో స్థానికులు పాల్గొనడం విశేషం. శనివారం రాత్రి అమలాపురం చేరుకున్న ఆయన అక్కడే బసచేసి ఆదివారం అక్కడి నుంచి అంతర్వేదికి మళ్లీ నడక ప్రారంభించారు.

మల్లాడి కృష్ణారావు సుదీర్ఘకాలంగా యానాం ఎమ్మెల్యేగా ఉన్నారు. పాండిచ్చేరి ప్రాంతమైనప్పటికీ యానాంకు చుట్టుపట్ల ఉన్న ప్రాంతాలతో మంచి సంబంధాలుండడం.. ఎమ్మెల్యే మల్లాడికి కూడా మంచి పేరుండడంతో ఏపీ ప్రాంతాలైన అమలాపురం - అంబాజీపేట - ముమ్మడివరం తదితర ప్రాంతాల ప్రజలు ఆయన్ను అభిమానిస్తుంటారు. ఆ క్రమంలో ఆయన పాదయాత్రలో చాలామంది పాల్గొని.. ఆయన్ను కలుస్తున్నారు. మొత్తానికి ఏపీలో పాండీ ఎమ్మెల్యే పాదయాత్ర అద్భుతంగా సాగుతోంది.