టెంకాయలు కొట్టి కొత్త తలనొప్పులు తెచ్చారే!

అభిమానం ఉండొచ్చు.. కానీ అదేదీ హద్దులు దాటకూడదు. తమ చేష్టలతో తాము ఎంతగానో అభిమానించే నాయకుడికి తిప్పలు తీసుకురావటానికి మించిన ఇబ్బంది మరొకటి ఉండదు. ఇప్పటికే ఇబ్బందికర పరిస్థితుల్ని ఎదుర్కొంటూ.. పెదవి విప్పలేక కిందామీదా పడుతున్న టీఆర్ఎస్ సీనియర్ నేత కమ్ సీఎం కేసీఆర్ మేనల్లుడు హరీశ్ రావుకు కొత్త తలనొప్పిని తీసుకొచ్చారు ఆయన వీరాభిమానులు.

తాజాగా ఆయన ముఖ్యమంత్రి కావాలని కోరుకుంటూ జోగులాంబ గద్వాలలోని బాలబ్రహ్మేశ్వరస్వామి ఆలయంలో ఆయన వీరాభిమానులు వెయ్యి కొబ్బరికాయలు కొట్టటం సంచలనంగా మారింది. ముఖ్యమంత్రి కేసీఆర్ గురించి ఏ మాత్రం అవగాహన ఉన్నా.. ఇలాంటి పని అస్సలు చేయరన్న మాట వినిపిస్తోంది. ఇప్పటికే హరీశ్ ను పక్కన పెట్టేసే కార్యక్రమాన్ని దిగ్విజయంగా చేస్తున్న కేసీఆర్ కారణంగా హరీశ్ మీద ఒత్తిడి అంతకంతకూ పెరుగుతోంది.

తనకు ఎదురవుతున్న అవమానాల్ని పెదవి మాటున భరిస్తూ.. బయటపడలేక.. లోపల దాచుకోలేక తీవ్ర ఇబ్బందికి గురి అవుతున్నట్లు సమాచారం. సీఎం సొంత మీడియాలో హరీశ్ ఫోటో రెగ్యులర్ గా వేయని పరిస్థితి. ఆ మధ్య అయితే.. కొన్ని నెలల పాటు ఫోటో వేయకుండా ఉండిపోయారు. ఉన్న మంత్రి పదవిని రెండోసారి అధికారంలోకి వచ్చిన తర్వాత ఇవ్వకుండా ఉండిపోయిన కేసీఆర్ ను క్వశ్చన్ వేసే వారే లేరు.

కొడుకును తన రాజకీయ వారసుడిగా ప్రకటించటంతో పాటు.. పట్టాభిషేకం చేయటం ద్వారా తన కోరికను తీర్చుకోవాలని భావిస్తున్న కేసీఆర్ కు హరీశ్ ను ఎలా కంట్రోల్ చేయాలో ప్రత్యేకంగా చెప్పాల్సిన అవసరమే లేదు. ఇందుకు తగ్గట్లే ఆయన వ్యవహరిస్తున్న తీరు తెలిసిందే. ఇలాంటివేళ.. వెయ్యి టెంకాయలు కొట్టి హరీశ్ తెలంగాణ సీఎం కావాలంటూ వీరాభిమాని చేసిన చర్యతో హరీశ్ కు లాభం కంటే నష్టమే ఎక్కువన్న మాట వినిపిస్తోంది. మొత్తానికి అభిమానంతో అభిమాని చేసిన పని హరీశ్ కు మాత్రం సరికొత్త అవమానాలకు తెర తీస్తుందన్న అభిప్రాయం వ్యక్తమవుతోంది. మరేం జరుగుతుందో చూడాలి.