ఆర్మీ అధికారి సాయితేజ కుటుంబానికి అండగా మంచు విష్ణు

తమిళనాడులోని కూనూరు అటవీ ప్రాంతంలో బుధవారం జరిగిన హెలికాప్టర్ ప్రమాదంలో 13మంది ఆర్మీ అధికారులు కన్నుమూయడం విషాదం నింపింది. భారత త్రివిధ దళాదిపతి బిపిన్ రావత్ తోపాటు చిత్తూరు జిల్లాకు చెందిన యువ ఆర్మీ అధికారి సాయితేజ కూడా మరణించడంపై అందరూ నివాళులర్పిస్తున్నారు.

ఆంధ్రప్రదేశ్ లోని చిత్తూరు జిల్లాకు చెందిన లాన్స్ నాయక్ బి.సాయితేజ హెలికాప్టర్ ప్రమాదంలో మృతిచెందారు. సాయితేజ మరణవార్తతో ఆయన స్వగ్రామం రేగడపల్లిలో విషాద ఛాయలు అలుముకున్నాయి. సాయితేజ భార్య, ఫ్యామిలీ కన్నీరుమున్నీరవుతున్నారు

సాయితేజ మృతి పట్ల సినీ, రాజకీయ ప్రముఖులు సంతాపం తెలుపుతున్నారు. ఈ యువ ఆర్మీఆఫీసర్ మరణంపై విచారం వ్యక్తం చేస్తున్నారు.

తాజాగా మూవీ ఆర్టిస్ట్ అసోసియేషన్ అధ్యక్షుడు మంచు విష్ణు సైతం స్పందించారు. విధి నిర్వహణలో మృతిచెందిన సాయితేజ కుటుంబ సభ్యులను గురువారం మంచు విష్ణు పరామర్శించారు. మంచు విష్ణు చిత్తూరులోనే ఉన్న శ్రీ విద్యానికేతన్ విద్యాసంస్థల సీఈవోగా పనిచేస్తున్నారు. ఈ క్రమంలోనే ఆజిల్లాపై మమకారంతో ఆ జవాను కుటుంబాన్ని ఆదుకునేందుకు ముందుకు వచ్చారు.

మదనపల్లిలోని ఎస్.బీఐ కాలనీలో ఉంటున్న సాయితేజ సతీమణి శ్యామలకు ఫోన్ చేసి మంచు విష్ణు మాట్లాడారు. యుక్త వయసులోనే దేశ భద్రతను రక్షించే అత్యంత గొప్పదైన సీడీఎస్ చీఫ్ సెక్యూరిటీ అధికారిగా ఉన్న సాయితేజ అకాల మరణం పై విచారం వ్యక్తం చేశారు.

ఈ క్రమంలోనే సాయితేజ ఫ్యామిలీకి తనవంతు సాయం అందించేందుకు ముందుకు వచ్చారు. సాయితేజ ఇద్దరు పిల్లలు మోక్షజ్ఞ(05), దర్శిని(2) లను తన సొంత బిడ్డలలాగా సంరక్షిస్తానని.. శ్రీవిద్యానికేతన్ విద్యాసంస్థల్లో వారికి పూర్తి ఉచితంగా చదువు, హాస్టల్ సౌకర్యం కల్పిస్తానని ఆయన హామీ ఇచ్చారు. 10 రోజుల్లో మదనపల్లికి వచ్చి కుటుంబ సభ్యులతో మాట్లాడుతానని ఆయన శ్యామలకు హామీ ఇచ్చారు.