జడేజా నా నోరు మూయించాడు : మంజ్రేకర్

ప్రపంచకప్ నుంచి టీమిండియా నిష్ర్కమించింది. టాప్ ఆర్డర్ ఘోర వైఫల్యంతో టీమిండియాకు పరాజయం ఎదురైంది. కనీసం వంద కూడా దాటదని అనుకుంటే రవీంద్ర జడేజా 70 పరుగులకు పైగా చేసి ధోనితో కలిసి భారత్ పరువు కాపాడాడు. చివరి దాకా జడేజా ఉంటే భారత్ గెలిచేదే. ఒంటిచేత్తో బాగా లాక్కువచ్చిన జడేజా శాయశక్తులా ప్రయత్నించాడు.

కాగా కొద్దిరోజుల క్రితం ఇదే జడేజాను సీనియర్ క్రికెటర్, ప్రస్తుతం కామెంట్రీ చేస్తున్న మంజ్రేకర్ విమర్శించాడు. ‘జడేజా స్మార్ట్ గల్లీ క్రికెటర్’ అంటూ నోరుపారేసుకున్నాడు. గడిచిన 44 ఇన్నింగ్స్ లలో జడేజా చేసిన అత్యధిక పరుగులు 33 మాత్రమేనని.. జడేజా ఆటతీరు ఇదీ అని ఆడిపోసుకున్నాడు. దానికి జడేజా కూడా గట్టిగానే ట్విట్టర్ లో బదులిచ్చాడు.

అయితే సెమీస్ లో భారత్ పరువు నిలిపిన జడేజాపై తాజాగా మంజ్రేకర్ పొగడ్తల వర్షం కురిపించాడు. బాగా ఆడావు జడేజా అంటూ ట్వీట్ చేశారు.నన్ను పీస్ పీస్ చేశాడంటూ కొనియాడారు. అంతేకాదు.. కామెంట్రీ చేస్తూ జడేజాను అలా తిట్టినందుకు సారీ చెప్పాడు మంజ్రేకర్.

కాగా మంజ్రేకర్ కామెంట్లను గుర్తు చేసుకున్న జడేజా సెమీస్ లో 50 పరుగులు చేయగానే బ్యాట్ ను కత్తిలా తిప్పుతూ మంజ్రేకర్ కూర్చున్న వైపు కసిగా చూపించాడు. ఇలా జడేజా, మంజ్రేకర్ వివాదం ప్రస్తుతం సోషల్ మీడియాలో సాగుతోంది. నెటిజన్లు మంజ్రేకర్ ను ట్రోల్ చేస్తూ విమర్శిస్తున్నారు.